O le agaga finau ma tauivi e le faamamulu gofie o se tulaga lea na manumalo ai se tasi o tamalii i Sini nei Afioga Leuluaialii Semu Sasulu ma le faletua ia Limaauga So‘o Sasulu ma le fanau.
O le tausaga 1996 na amata vaaia ai e i laua le moomia e tatou tagata Samoa i Sini faapea isi uso Pasefika le fiafia i le mataiai o le atunuu o le ‘Panipopo’.
“Na amata loa ona ou gaosi le panipopo, ua le gata o le faatau atu i la latou aulotu ma isi Ekalesia.” Sa lē faapito lenei tautua ma tatala atu ai mo soo se tasi e faia mai ni oka auā Aso Faapitoa. “Sa iai lau taavale tuai na iai ma amata ai loa ona ou faafesootai faleoloa na faatau ai oloa Samoa ma taumafa.” Na matuā atili ona alumia le Panipopo ina ua tofo ma faatau e le atunuu aemaise le faatupulaia ai o le manaoga mo lea taumafa”.
Sa faafetaia e le Afioga Leuluaialii ma Limaauga le agalelei o le Atua talu ai o nisi o taimi sa iai nai luitau i le taumafaiga. O le Afioga Leuluaialii Semu Sasulu mai le alalafaga o Saleapaga i Aleipata sa a‘otauina i le Kolisi o Samoa i le vaitau o le 1970’s. O le faletua ia Limaauga So‘o sa maua foi lana tusipasi Hospitality i le TAFE NSW.
O le Aso Toonai 4 o le masina nei i Bankstown Sini na tatala Aloaia ai le Sasulu’s Catering e pei ona valaaulia ai le Aufaigaluega mai Ekalesia eseese o Sini ma le mamalu o le atunuu i se taumafataga tele e faailoa ai le felanulanuai ma le manogi o taumafa Samoa e gaseseina e le Sasulu’s Catering.
E tele Taleni a Leuluaialii ma Limaauga. O lea lava po na faafiafia ai foi Leuluaialii ma lana faaili ma ona alo ma ana uo e pei ona faafofoga i ai le atunuu na potopoto. E pei o upu a le atunuu, na foi le valaaulia ma le vaa ua goto ma le mama ua lomi i lea po.
O le Aso Gafua la o le valiaso talu ai na tatala ai le Faleoloa o loo Gaosia ai le Panipopo ma isi Taumafa Samoa i lona nofoaga i Sefton e faafesagai tonu ma le Nofoaga e faatali ai nofoaafi a Sefton i Sini.
O lenei nofoaga ua maua ai taumafa masani a Samoa e faasoa ai foi le taleni kuka ma le tautua a le Afioga ia Leuluaialii ma Limaauga So‘o e pei ona amata tautua ai talu le 1996 e ala i le kilivaina o le Panipopo lea ua maua nei lona nofoaga tumau.
O loo galulue foi i laua i le Tofi Peresitua i le Ekalesia o le Au Paia o Aso e Gata Ai i Punchbowl.
