Ua taunuu faamoemoega sa faananau i ai le Ekalesia LMS Toefuataina, o le fia maua o se fanua i Samoa e faatu ai lona nofoaga tutotonu e tapuvae tasi i ai ana fonotaga ma isi fuafuaga.
O le tausaga ua mavae na tuuina atu ai se talosaga a le Ekalesia LMS Toefuataina i le alii Palemia ma le Malo mo se fanua, peitai sa iai nisi o taitai o le ekalesia sa faasala ese ai o latou lagona, ma o le mafuaaga lea ua toe malaga mai ai sui o le ekalesia ma toe faataoto se isi polokalame lea ua faatau ai le tolu eka i se vaega o Aleisa i se tau e $50,000 i le eka e tasi.
O se fanua ua matagofie tele e pei ona faaalia e le susuga Faiumu Pio Faletua‘i o se tasi o faafeagaiga, mo le faatuina ai o se nofoaga tutotonu o le ekalesia i Samoa.
Na ia faamatala e maualuga le nofoaga o le fanua e mataina le silasila mai i le sami i le taoto atu o le gataifale o nuu e pei o Tuanai ma Afega aemaise e iloa atu foi ma atumauga o le motu o Salafai.
O le susuga i le faifeau toeaina, Tuimaseve Misikupa Gasu, na fai ma fofoga tau momoli o le aumalaga e saunoa i le faamoemoe o le ekalesia. Na faaalia e le toeaina e pei lava o upu, e iloa le Isaraelu moni e susu‘e le faamalama ma tilotilo i lona nuu moni, le mafuaaga o le naunau o le ekalesia e faatu lona nofoaga tutotonu i Samoa.
E na o le tasi le aulotu ua faatuina i Samoa a lea ekalesia, na faatuina ma fofoa mai lona amataga i Ausetalia e le susuga i le faafeagaiga ua maliu le susuga Tepa Faletoese.
O le taimi nei ua iai aulotu o le LMS Toefuataina i Amerika, Aotearoa ma Ausetalia, ae o le faamoemoe ia mafai ona tupu ma ola le galuega, ma ia mafai ona iai nisi ekalesia i isi atunuu o loo aumau ma alala ai tagata Samoa.
E leai se eseesega o le faatinoga o tapuaiga a le ekalesia ma le faiga o lotu a le EFKS, ae e iai nai vaega laiti e eseese ai ona pulega ma le taitaiga.
O le vaega o loo totoe o le tau o le fanua o le a togitogi pea seia oo ina mae‘a ina ua taoto se feiloaiga i le va o faafeagaiga ma lē e ana le fanua.
O le mae‘a o le feiloaiga a le tusitala ma susuga i faafeagaiga ma nisi o sui o le aumalaga sa i Samoa, na faaaloalo ane ai i le tusitala e ala i se laui‘a tele ma le pasese e $100 tala. Na talia lelei le faaaloalo ona o tulaga masani ia i le faa-Samoa. Ia toe faatutumu e le Atua ‘ato tetele ua faagaogaoina ona o le agalelei.
