Sa iai le talitonuga o le toatele e le toe foi aiga lotu o le ekalesia Katoliko i Vaopunimatagi i Falealupo-tai i le nofoaga sa faamautu ai ma tautua le ekalesia a o lei agi le ‘afa malosi o Ofa i le tausaga e 1990, lea na faaleagaina ai le malumalu, ae faatamaia fale o aiga ma isi meatotino tāua.
O le taimi nei ua toe nofoia fanua o aiga sa lafoai ae agai i uta e faamautu ai, ina ua tuanai afā e lua na sosoo i le tausaga e 1990 ma le 1991.
I le lua sefulu tausaga talu ona tuanai le afā o Ofa, ua toe tulai nei le malumalu fou o le ekalesia Katoliko i Vaopunimatagi, ina ua a‘e se finagalo o le afioga i le Aki Epikopo o Alapati Mataeliga, ia toe fausia le malumalu ma toe faaauau le lotu e pei ona sa iai muamua.
“O le naunautaiga o le tamā o le Puleaga e faia le galuega ona o le uluai ekalesia Katoliko lea i lea faaitu o Savaii sa avea ma Matagaluega e tasi i lea vaega o le motu i tausaga e tele ua mavae”.
O le finagalo lea o le afioga Patele Telonimo Peseta Fuiono, o ia o le sui o le Aki Epikopo i Savaii, lea sa ia tausia le matagaluega a Falealupo a o lei sui atu i le isi o faifeau Patele le afioga Niu Sila Niu Sila.
O Oketopa o le tausaga na tea nei na amata ai ona toe fau le malumalu ae o le Aso Faraile 17 o Fepuari 2012, na umusa ma tatala aloaia ai.
“E tasi le tausaga le umi o fau le malumalu ma e mafua ona sa tele isi galuega ma atina‘e sa ave i ai le faamuamua a le ekalesia”. Faaalia foi e le sui Epikopo mo Savaii, e lē faigofie nei aso i le sailiga o seleni e fau ai malumalu ona ua taugata le soifuaga.
O le mafutaga a Falealupo i Ueligitone i Niu Sila na saili fesoasoani i ai le ekalesia ma maua mai ai se tinoitupe e $30,000 tala Samoa. Sa maua foi fesoasoani mai nisi o uo ma paaga a le ekalesia aemaise o aiga lotu lava o le ekalesia Katoliko i Vaopunimatagi i Falealupo.
O le tau atoa o le galuega e $700,000 ae o le aitalafu o loo iai e $12,000.
“E maeu le agalelei o le Atua i lana fanau, auā e lē gata ina sa tagi i lima le galuega ae sa fesoasoani mai foi le ekalesia aoao”.
O le toe amatalia o le ekalesia i Falealupo-tai, ua lua ai nei ekalesia Katoliko i le nuu, lea ua iai ma le ekalesia Katoliko i Falealupo-uta.
O le ekalesia lea na faavaeina ina ua siitia i ai le lotu ina ua afatia le malumalu ma maota sa faamautu ai le aufaigaluega.
Ua momoli ai le faafetai a le sui Epikopo i tamafanau a Falealupo i soo se ekalesia o alala i Niu Sila aemaise o Ueligitone ona o le talileleia o le sailiga seleni auā le faamoemoe o le galuega a le Atua. Sa fausia faatasi le malumalu ma le maota sa faamautu ai Tamaitai Sa i tausaga ua mavae, lea ua avea nei ma maota e faamautu i ai le tausi Matagaluega.
“O se maota ua mae‘a fausia atoa i ona vaega ma ua matuā lelei ma mautu”, saunoa ai le afioga Patele Telonimo.
