O le Aso Tofi o le vaiaso na tea nai, sa faapea foi ona taunuu ai i Samoa le tamaitai Komesina o Niu Sila, Ms Caroline Bilkey.
O le taunuu ai o le komesina o Niu Sila i le atunuu, o loo faapea ona afea ai e le aumalaga a le vaegaau o le vateatea a Niu Sila na taunuu i Samoa i le tasi le aso muamua atu, a o lei taunuu atu le tamaitai komesina.
O le aumalaga a le RNZAF poo le Royal New Zealand Air Force, na taunuu i Samoa, ma o loo faamautu nei i le malae vaalele faavaomalo i Faleolo.
O le iai o le vaega au a Niu Sila i le atunuu, o se vaega o le latou polokalame faapitoa ua faaigoaina o le TROPIC ASTRA.
Na faailoa e le alii ofisa sinia o le vaegaau a Niu Sila, Wing Commander Karl Harvey, o le taunuu atu o le asiasiga a Ms Bilkey ma Mr Anderson, o se avanoa maualuga ma le taua tele mo fitafita ma le vaegaau, a o iai i Samoa.
E silia i le toa selau fitafita o loo auai i le polokalame lenei.
O loo malaga faatasi le tamaitai komesina o Niu Sila, ma le alii komesina o le malo o Ausetalia, Mr Matt Anderson, faatasi ai ma se aumalaga mai le ofisa o le Hai Komesina a Niu Sila.
O le auai o komesina o malo e lua, o se malaga faapitoa lava mo le lagolagoina o le faamoemoe o le Air Force, atoa ai ma le naunautaiga e feiloai atu i tagata taitoatasi o le vaegaau.
E le gata i lea o le taumafai ina ia saga faamalosia ai pea i latou mo le faiga o galuega fesoasoani ma le lelei mo tagata lautele i malo o le Pasefika, ina ia saga faamautu ai pea faiga paaga mo le lumanai.
O le polokalame o le TROPIC ASTRA 2009, na amata ma i le aso 29 o Iulai, ma e faamoemoe e oo atu i le aso 1 o Setema o le tausaga nei lenei polokalame.
O vaega o loo aofia ai i lenei fuafuaga atoa, e aofia ai aoaoga le toe faaolaola mo le taimi e feosofi ai i fafo mai le vaalele mai luga o le ea atoa ai ma galuega fesoasoani muamua.
Mo Samoa lava ia o le a fesoasoani le vaegaau mo le malo, o le faataunuuina lea o ni aoaoga i tulaga uma e manaomia pe a tutupu ni faalavelave a o iai se faigamalaga i luga o le ea, aemaise ai pe faapefea ona fesootai i taimi o faalavelave faafuasei.