O le Aso Lua, aso 22 o le masina nei lava ua faamoemoe e taunuu ai i Aukilani, le tino maliu o le fitafita a Niu Sila, ae o se alo ma se tamafanau a Samoa, le alii o Kirifi Mila e 27 tausaga le matua. O le malae vaalele faavaomalo a Niu Sila, i Aukilani lava o le a faatalia lona taunuu mai, ona molimoli tuusa‘o atu ai lea i Kalaiesetete mo le sauniga faalemalo o le a faia ai.
O le Aso Tofi, aso 24, ua iai le fuafuaga mo le sauniga a le malo, e pei ona tapenaina i Kalaiesetete. O lea sauniga o le a faatautaia lava ma polokalame e le Vaegaau a Niu Sila. (New Zealand Army-Defence Force), faapea le malo o Niu Sila.
O Kirifi Mila, sa nofo i Kalaiesetete ma agai ane ai i totonu o le togalauapi a le vaegaau i Bernham, ma o lona uluai ulufale foi lea i le NZARMY.
O le mae‘a o le sauniga faalemalo i Kalaiesetete, ona toe liliu ai lea i Aukilani, mo le sauniga faaleaiga o le a faia ai, atoa ai ma lona toe sauniga.
O le Aso Faraile, aso 25 o le a faataunuuina ai lea fuafuaga, a o le Aso Toonai e sosoo ai, aso 26, o le a molimoli ai lona tino maliu i lona oliolisaga tumau i le fanua maliu i Hemilitone.
O le po o le Aso Faraile lava lea pe a mae‘a ona sauniga faaleaiga, o le a tofa ai ma moe i le maota faasausau poo le falemaliu o Ligaliga i Magele, ona sauni ai lea mo Hemilitone e pei ona ta‘ua.
O vaa a le malo i le vaegaau i Whenuapai, o le a nafa ma le molimoliina o lona tino maliu i Hemilitone.
O le nofoaga poo le hall a le Ekalesia Faapotopotoga a le Atua, Pulepule Centre i Magele o loo fuafua mo le sauniga faaleaiga i Aukilani, peitai e lei mautinoa i le taimi nei ona o loo faagasolo pea fuafuaga ma polokalame a le aiga mo lea sauniga faapitoa.
O suesuega lava a le Samoa Times, na maua ai vaega e pei ona lomia ae na faamaonia mai e lona tamā ina ua maua se avanoa e fesootai atu i ai.
O loo taofia pea le faamatuuina e le tamaitai sooupu a le vaega e puipuia le saogalemu a Niu Sila, Mel Weddelle le tele o vaega sa taumafai e fesiligia mo lipoti.
E lē o mafai lava i le taimi nei ona faamatuuina mai nisi famatalaga a le Army a Niu Sila, e uiga i lona maliu ona o puipuiga masani, atoa ai ma le talosaga a le aiga ua mae‘a ona faato‘ai i ai, ina ia taofiofi le faalauiloaina o faamatalaga.
E oo lava foi i fesootaiga ma aiga o le fitafita, e lē o mafai foi ona latou tatalaina mai lea avanoa mo le au faasalalau.
Na pau le tulaga mautinoa e pei ona faafofoga i ai, o le alii o Kirifi na te lei faafoeina le taavale na mafua ai lona maliu.
O ia sa tu i luga o le taavale, faatasi ai ma le fana tele, mo le vaaia ma le galuega leoleo sa faataunuuina, peitai sa faafuasei ona tupu ai ma le faalavelave ma uma ai lona soifua.
O le 2006 na faamaonia mai e le vaegaau a Niu Sila, na ulufale ai lenei alo o le atunuu i totonu, ma faagasolo ai lona ona tiute e pei ona tauto ma ofoina ai lona soifua, la lea ua maliu ai lava o auauna ai.
Sa fuafua e toe maua se isi feiloaiga ma lona tamā o loo alala i Manurewa i Aukilani i Saute, ma faamae‘a ai nisi o vaega tāua sa manaomia i lipoti a le Samoa Times.
E ui i lea e lei toe manuia le taumafai atu i ai e tusa ai ma lea fuafuaga.
E tusa ai ma lipoti sa mauaina e faapea o nuu ma afioaga o le fitafita ua maliu, Kirifi Mila, o Manono, Sataoa i Upolu, ma Sapapalii i le motu tele i Salafai.
Tau ina ia faamaise le agaga paia o le Atua i mātua, uso ma tuafāfine, o aiga uma ma uo o ē vavalalata atu i le atalii ua toesea.
