E oo mai i le faaiuga o le vaiaso na tea nei, e lei mafai lava ona ulufale leoleo i Tuasivi i eleele o Gataivai e suesue le faalavelave na susunu ai ni fale nofo se lua o le aiga o Maposua Mulifusi na susunu e nisi o le nuu, ina ua le usitai le aiga i le faaiuga e tulai ma o ese ma le afioaga.
O le Aso Gafua 22 o Fepuari na feiloai ai leoleo ma le afioaga, peitai na mae‘a ia feiloaiga e le matuu le finagalo o le nuu e faataga leoleo e savavali i totonu o le afioaga mo le suesueina o le mataupu.
O le faalavelave na mafua i se faaiuga a le faamasinoga o Fanua ma Suafa na manumalo ai le aiga ua aafia laoa ma maota i le faamasinoga o le suafa Tiatia e pei ona faailoa mai e le faauluuluga o le ofisa o leoleo i Tuasivi.
“Na maea mai loa le faaiuga a le faamasinoga, fono loa le nuu ma tu le tootoo i le aiga o Mulifusi (Maposua) ua soloa i le au fuefue”, o le faamatalaga lea a le faauluuluga o le ofisa o leoleo.
O le tootoo na tu na ave ai ma le taimi e tatau ona oo atu i ai ua le toe vaaia se isi o le aiga, peitai e na o se tina matua ma ni tamaiti laiti se toalua sa iai i le fale i le taimi lea.
Na tea le taimi na tuu i le aiga e leai lava, ma o le mafuaaga lea na faatino ai loa le gaioiga na sunui ai fale.
Faaalia e leoleo na oo atu se valaau i le ofisa mo se fesoasoani.
Peitai e mamao tele le va o Tuasivi ma Gataivai, ma e oo atu leoleo ua mae‘a ona mu fale e lua ma se fale‘ai.
Na pau le galuega na faia e le malu o le Malo o le aveesea faavave o le tina matua ma tamaiti o le aiga i se nofoaga e malupuipuia ai.
E leai se soifua na aafia ae na mu uma fale ma meatotino a le aiga i le faalavelave.
Mai le Aso Lua, 16 o Fepuari 2010 na tupu ai le faalavelave e oo mai lava i le Aso Faraile (taimi i Niu Sila), e lei mafai lava e leoleo ona suesueina le mataupu, sei vagana ni alii se toalua o le nuu o Gataivai na mafai ona pueina e leoleo mai luga o se pasi ma le uafu i Salelologa ma ave loa taofia i le ofisa i Tuasivi.
O se gaioiga lea na savalia ai e le nuu le ofisa o leoleo ma talosagaina le tatala mai i tua o ia alii.
Peitai o loo taofia pea i laua i le vaaiga a leoleo i le taimi nei. E lei mafai ona maua se finagalo o le Komesina o le Matagaluega o Leoleo ma Falepuipui i le mataupu, ae o sona finagalo na tuuina atu i nisi o tusitala ua ia ta‘ua ai o le a taumafai leoleo e suesue pea le mataupu ma molia ni matai ma taulelea o le afioaga na aafia i le faaiuga ma le susunuina o fale ma meatotino a le aiga ua aafia.
