O se alii talavou ua lata i le 30 ona tausaga na sauni lona aiga ma le ekalesia e faia ona toe sauniga ae na logoina leoleo e se molimau i le mafuaaga na maliu ai le taulealea, ma faia loa le gaioiga e taofia ai lea fuafuaga ae se‘i suesue le mea na tupu. Faaalia e le sooupu o le Matagaluega o Leoleo ma Falepuipui afioga Leaupepe Fatu Pula, o sana asiga i se tasi sa taofia i se gasegase i le falemai i Motootua, ae logo ai o ia i le mataupu.
Na faaalia e Leaupepe na ia faatonuina leoleo e saili le tagata maliu i le falemai ma ia logo lona aiga e lē mafai ona tanumia lona tino ma faia ona toe sauniga seia vaganā ua mae‘a suesuega ma maua le mafuaaga tonu o le maliu.
Faaalia e le sooupu o le matagaluega o leoleo, o lē na maliu sa tietie i tua o se pikiapu sa la‘u ai se uta. Na pa‘ū ese o ia ma le taavale ma maliu ai ma o se vaega o Vaitele-uta na tulai mai ai lea faalavelave. Na faato‘ā tuu atu le tino maliu mo toe sauniga ina ua mae‘a suesuega e pei ona faaalia e leoleo.
O se alii talavou e faapea mai le sui sooupu o se atalii o se faifeau o se ekalesia Kerisiano i Vaitele-uta ua molia i le ave taavale faatamala ua mafua ai le maliu o lea taulealea talavou. O loo molia foi i le ave taavale ae leai se laisene e faataga ai ona uu le foeuli o le taavale.
I se faamatalaga a Leaupepe Fatu na ia faaalia ai e iai mataupu faapea e masani ona tulai mai i nisi taimi, i le taumafai o nisi e vave teu se tino maliu e aunoa ma le logoina o le falemai poo leoleo, pe afai o se faalavelave na mafua ai.
O se solitulafono se gaioiga o le taumafai e natia se solitulafono aemaise lava pe a aafia se soifua o se tagata.
O le taulealea na aafia le soifua i le faalavelave tau taavale e mai se afioaga i Savaii e pei ona faaalia e se molimau, ae sa nofo i se aiga i Vaitele-uta ma faigaluega ai. E lē o faailoaina mai e le sooupu pe molia se tasi poo nisi i le gaioiga o le lē logoina o leoleo i le faalavelave na tupu.
O ni mataupu faapea sa aliali mai i tausaga ua tuanai na toe eli ai se tino maliu ua faitau aso talu ona teu, pe a logotala leoleo o se faalavelave na mafua ai. E lei mamao tele atu foi suesuega a leoleo na taumafai ai e saili le vaega na tanumia ai le tino o se teineititi 14 tausaga.
O mātua o le teineiitiiti ua soloatoa i le falepuipui se faasalaga a le faamasinoga ina ua la ioeina le faaoolima i le teineititi na mafua ai ona uma lona ola.
O sailiga a leoleo e lei manuia mo le fia maua o le vaega tonu na tanumia ai le tino o le la tama teine. O Faafetai ma Faasalafa Sione le ulugalii o loo falepuipui i le taimi nei.
