O le Aso Lulu o le vaiaso na tuanai atu nei aso 9 Setema 2009, sa toai taunuu mai ai i laueleele o Niu Sila nei le faigamalaga a le susuga i le Tausi Matagaluega ma lona faletua, ae le gata i lea o le mamalu i tamalii o le Ekalesia Metotisi mai le afioaga o Tanugamanono, lea sa malaga faapitoa mai mo le faamoemoe e ala lea i le faalauiloaina o le tautua pese a le aufaipese, lea ua mafai ona pueina i se auaunaga i luga o televise poo le DVD, atoa ai ma le latou tautua pese ua tuufaatasia aua le faafofogaaga i luga o leitio poo le CD.
O lenei faamoemoe sa faapea ona faatalia e le mafutaga o loo fausia mai i le paia i aiga o le ekalesia sa faapea ona galulue ai i Samoa, ae o lea ua afifio mai ma aumau i Niu Sila nei, lea e taitaifono ai le afioga Lemauga Tulei Seiuli, ae failautusi ai le susuga Mulipola Mutimuti Fonoilaulii.
O le toai taunuu mai o le malaga sa faapea ona faataoto ai le polokalame aua le faamoemoe, lea na faataunuuina i le Aso Toonai na sei mavae atu nei i le hall a le Tafesilafai a le Ekalesia Metotisi i Manukau.
O lenei faamoemoe o le Posiva lea sa tuufaatasia e le mafutaga i Niu Sila ma na matua faatumulia i le mamalu ma le paia maualuga o Samoa potopoto, o aiga ma uomamae a le ekalesia.
Sa faatasi mai ai foi ma le Sinoti i Aukilani i Matu lea o loo taitaia e le afioga i le Tama Sea ia Rev Logo Ofe ma le Peresitene Sili o le Auso, le faletua ia Sunema.
Sa auai mai ai foi ma le Sinoti a le laumua i Ueligitone lea o loo taitaia e le Tamā Sea ia Rev Savaii Loto ma le faletua ia Perise.
I lea lava posiva sa faapea ona faalauiloa ai ma lenei tautua pese e pei ona pueina i se ata tifaga aua le maimoaina i luga o le televise lea o loo iai foi ma faaevagelia o loo faatinoina uma lava e le aufaipese a le Ekalesia Metotisi i Tanugamanono. I le maea ai o le faamoemoe sa faapea ona tuufaatasia ai se tinoitupe e $38,000.00 o le aotelega lea o le aao mafola ma le alofa tulai o le paia maualuga sa faapea ona iai i le aso.
O le faamoemoe e pei ona sa pueina ai lenei ata pese ma le tautua pese i luga o le leitio e ala i le CD, o se vaega o a latou taumafaiga aua le sailia lea o se tupe mo le latou galuega e ala i le malumalu tapuai.
O le auga foi lea o le posiva e pei ona sa faataunuuina i le Aso Toonai na sei mavae atu nei. O lenei tautua pese ua maea ona tapenaina i le maualuga e pei ona iai ata faaonapo nei.
Ua molimauina foi e le tusitala le matagofie o faaevagelia o loo pueina ai, ae le gata i lea o le matagofie o siufofoga o le aufaipese e pei ona iai i le latou tautua pese lea ua tuufaatasia i le CD.
O le afioga Toleafoa. S. Toleafoa mai le MNS CD/DVD Production i Ausetalia sa nafa ma le pueina o lenei galuega, ma e na o le ono lava vaiaso sa tuufaatasia ai ae maea loa.
O le aumalaga mai Samoa sa taitaia mai lava e le susuga i le Tausi Matagaluega o le Ekalesia le susuga Tamatasi Tuivanu ma le susuga Faatupu Unasa Lauina, o le failautusi o le komiti o tapenaga o le malumalu, sa malaga mai ai foi ma le susuga i le failautusi o le aufaipese le susuga Kalala Tagaloa Palemene, ma nisi o tupu ma tamalii o le ekalesia ua le māua o latou suafa.
O lenei faigamalaga ua fuafua e toe taliu i Samoa i le faaiuga o le vaiaso nei.