Ta’uleagaina le faifeau i tuua’iga o le mataifale i lona afafine

Opapo Soanai Oeti

E lē o mautinoa poo afea e faailoa ai le faaiuga a le tamaitai Faamasino, Niava Mata Tuatagaloa, i le mataupu, e pei ona su ai e le Susuga i le faifeau Ekalesia Faapotopotoga Kerisiano Samoa (EFKS), Opapo Soanai Oeti ma lona afafine le nusipepa a le Samoa Observer i Samoa.

E pei ona lipotia muamua, e tusa ma le $750,000.00 le aofaiga o le tagi a Opapo i le Samoa Observer. O le vaiaso na tea nei, lea na folasia ai finauga faaiu a loia o loo tulai mo itu uma e lua i luma o le faamasinoga maualuga i Mulinuu.

O le tamaitai loia o Muriel Lui o loo tulai mo le faifeau ma lona afafine o Toaipuapuaga Oeti Patrick. O le tamaitai loia o Su’a Hellene Wallwork Lamb o loo finauina le itu a le Samoa Observer i le mataupu.

E lua lava vaega na amata ai le folasaga a Muriel Lui, o le finauina lea, o le tusi i le faatonu lea na lomia i le Samoa Observer i le aso 29 o Mati 2017, o loo tuua’ia e atagia ai le taufaaleaga faasaga ia Opapo ma lona afafine. O le lona lua o le talosaga o le faatumauina lea o tupe e tatau ona totogi, pe a faamaonia na iai se taufaaleaga i tusitusiga a le Samoa Observer.

O loo finau le itu tagi, o le tusi o le aso 29 o Mati 2017, lea na lomia e le Samoa Observer, e tutusa lelei ma tusitusiga a le OLP, lea na tusia i lana itulau o le Facebook, i le aso 26 o Mati 2017. Na toe tusi foi e le OLP le isi ana tusitusiga e faatatau lava ia Opapo ma lona afafine o Toa i le aso 27 o Mati 2019.

O tusitusiga a OLP, na ia tuua’ia ai Opapo ma lona afafine o le mataifale poo le incest. O lea lava tusitusiga, o loo tuua’ia ai e faapea, o le fanau a Toaipuapuaga, na toe maua lava i lona tamā moni poo Opapo. O le isi tusitusiga, na lu’i ai e OLP Opapo, ina ia faia se suesuega faapitoa e suesue ai DNA a lana fanau, e iloa ai poo le fanau a Opapo.

O tusitusiga uma la nei a OLP, o loo finau ai le loia a Opapo, na toe lolomi e le Samoa Observer i le Tusi i le Faatonu. O le tusi i le faatonu, na tusi e se tagata na ia faaaogāina le igoa M.R. e aunoa ma se fesootaiga o Opapo e faatatau i ia tuua’iga. O le folasaga a Muriel, na ia faaalia ai o loo manino lelei le taufaaleaga o tusi ia faasaga ia Opapo ma lona afafine, i lalo o le tulafono o le faia o faamatalaga e faaleagaina ai se tagata, poo le innuendo, ma o faamatalaga foi ua tamau ai le iloa e tagata lautele o ni tuua’iga tugā e faaleagaina ai se tagata.

Fai mai Muriel e ui ina sa muai lomia e le OLP tuua’iga ia, ae o le tuua’iga o le mataifale o Opapo i lona afafine, o le aano lea o le finauga o loo fai nei.

Finau Lui, e ui ina mulimuli lomia e le Observer le tusi, e tutusa lelei ma lomiga a OLP, ae ua iai nisi ua o latou silafia e tauala i le lomiga a OLP ae ua atili ona iloa tele le tagata ina ua toe lomia e le Observer i le aso 27 o Mati 2017.

O faamatalaga taufaaleaga ia, e pei ona finau Muriel ua telē ai le aafiaga o Opapo ma lona afafine, aemaise o le tiga ma le maasiasi na aafia ai lona aiga. O faamatalaga taufaaleaga foi ia, na faaopoopo atili i le aveeseina o tofi faifeau a Opapo e le autoeaina a le Ekalesia.

E ui na muamua aveese tofiga faifeau a Opapo, ae lei lomia tusitusiga nei, ae o loo finau le loia, na faatoa faamaonia e le fonotele i Malua mulimuli ane le aveese o tofi faifeau a Opapo, ae ua tamau i mafaufauga o tagata tuua’iga mataifale ia na lomia uma e le OLP ma le nusipepa.

Peitai o le finauga a le loia a le Samoa Observer, pe mo’i, na iai ni faiga taufaaleaga i tusitusiga a le nusipepa ma le OLP. Finau foi le itu tetee e lē fesootai tuua’iga taufaaleaga ia o loo pese atu ai le itu tagi, e aunoa ma le fesootai atu i tusitusiga a le OLP.

E 400,000 tala le tagi tau aafiaga general damages, $200.000.00 mo aafiaga faapitoa ua faaleagaina – aggravated damages, $100,000.00 mo aafiaga tau faalagona, ma tau faaopoopo a le faamasinoga.