E ui lava ina loulouā le amataga o le vaiaso na tuanai atu nei, ae sa lē mafai ona taofia ai le toatele o le tupulaga talavou na taupati ane i se polokalame faapitoa mo le autalavou na faaigoaina o le ‘Youth Tag & Empowerment Program’. O lenei faamoemoe sa agai tonu i le tapenaina o le fanau talavou ma soo se tagata i aafiaga o fualaau faasāina i le soifua faapea foi i faalavelave ma vesiga e alia‘e mai i totonu o aiga ma siomiaga o loo iai.
O le ekalesia Peace Chapel i Tidal Rd i Magele o loo taitaia e le faafeagaiga, le susuga Peter ma le faletua o Vaonila Leota sa talimalo i lea faamoemoe. O se taumafaiga sa galulue faatasi ai ma le matagaluega o leoleo, o le aufaigaluega a le Tupu Services faatasi
ai ma le Ministry of Youth and
Social Development.
E lua aso sa faagasolo ai lenei faamoemoe. O nisi lava o alo ma tamafanau a Samoa ua faamanuiaina ma taulamua i galuega i totonu o le malo Niu Sila nei sa saunia ni faamalosiau mo le tupulaga lalovaoa sa auai i lea mafutaga.
Sa matuai faamanuiaina le fanau talavou na faalogologo i lea aso i le tufa mai foi a le alii leoleo Constable John Maea Brown, faapea foi ma le Susuga Eroni Clarke e uiga i le faaaogāina lelei o aso o le olaga, ma taumafai e ausia se taunuuga manuia ae lē o le faalialiavale atoa ai ma le aafia i soliga tulafono ona ua tagofia le ‘ava ma fualaau faasāina.
O le aufaigaluega a le Tupu Services na latou tapenaina galuega fai ma polokalame faaleaoaoga sa feagai ai i lea aso. Sa faapea foi ona auai sui o le Health Prevention Agency e faalauiloa foi lo latou sao i le unaia lea o le fanau talavou i le ogaoga ma le leaga
o aafiaga pe a tagofia le ‘ava ma fualaau faasāina.
Sa saunoa le faafeagaiga ia Peter Leota e tāua tele lenei faamoemoe auā le tapenaina lelei o fanau talavou mo le lumanai, ona o nei ona po ua sau faagalulolo le tele o faafitauli e aafia ai tupulaga, ae ao lava ona amatamea Ekalesia i le totōina o se fatu lelei e tapenaina ai pea le fanau mo le ola tuputupu a‘e.
E le gata la i le Upu a le Atua, ae aafia ai foi galuega fai e pei ona tapenaina e le Tupu Services i lea aso.
Sa faafetaia foi e le faafeagaiga le Matagaluega a le Youth and Social Development ona o le lagolagoina o le faamoemoe e ala i seleni faamatuu mai. O loo ua iai foi se faamoemoe o le ekalesia ma le autalavou e faaauauina lenei faamoemoe i tausaga uma pe a tusa ai ma le finagalo alofa o le Atua.
Na faaiuiina le faamoemoe i se taamilosaga TAG Tournament i le aso na sosoo ai. E 12 ‘au mai faalapotopotoga ma ekalesia na auai ai.
E pei ona silafia o le TAG o se tasi foi o taaloga e fou mai i lenei vaitau, ma e maeu foi le fiafia o tupulaga Samoa e taaalo i lea taaloga.
O le iuga o lenei tauvaga:
1st place – Cool Dudes
2nd place Arrows
3rd place – Boggust Park
