Fanau ua mafai ona taina lesona i le aoga piano

Fanau ua mafai ona taina lesona i le aoga piano

E lē o tāua i mātua le mamao o nofoaga o loo nonofo ai, ma le tele o penisini alu i le momoliina o a latou fanau i aoga, ae faasilisili ia i latou le faaaogāina o ola o latou fanau i le Atua ma lana galuega.

O nisi o mātua e aumau i Papakura, Manurewa, North Shore, Pukekohe, Ranui, Otara ma Botany ae e naunau lava o latou loto e momoli a latou fanau i le susuga ia Poulima Salima e aooga ai i le taina o le piano ina ia faaaogāina fanau i totonu o ekalesia auā viiga o le Atua.  I le tausaga nei ua atoa ai le 6 tausaga talu  ona faavae mai le aoga a le susuga ia Polima Salima, ma ua siitia ai foi ma le fuainumera o tamaiti aoga o lea ua faaaogāina lea avanoa e a’otauina ai i lea a’oa’oga. E 70 tamaiti sa aooga i lenei tausaga ae 34 tamaiti sa mafai ona taina a latou lesona i le faaaliga lea sa faia i le afiafi o le Aso Sa ua mavae i le malumalu o le ekalesia Metotisi i Mount Albert.

O le matagofie o tapenaga a fanau i lea afiafi na vaaia ai le faatumulia o le malumalu i mātua ma aiga i le lolofi atu e molimauina taumafaiga a latou fanau o lea ua ausia le isi laasaga o a’oa’oga e pei ona faaaogāina ai o latou ola. Ae o le agaga meemee ma le loto fiafia foi lea i mātua ina ua latou lagonaina le tauia o le latou tautiga i le momoli i aso uma i aoga aemaise ai le pisi o le auala i afiafi e momoli ai ae naunau lava le loto ia tau lau o manaoga o mātua. Lea ua silamio ma silasila i latou i lea aso ma e alaga ai le viiga o le Atua ona ua vavala mai le tali o manaoga e ala ia latou fanau.

O le polokalame o aoga a tamaiti e amata i le 3 i le afiafi i le taimi e tuua ai aoga, ona faasolo lea o lesona a tamaiti i le ta’i ‘afa itula a le tamaititi ma ua uma foi ona faatulaga le tamaitiiti ma lona taimi e aoga ai. E lē mafai ona faalavelave lenei polokalame i le taimi o aoga a le fanau o le ala foi lea o le naunau o mātua i lea aoga afiafi ona ua latou iloa o loo fetaui lelei le taimi e fai ai ma le tuua o aoga a fanau.

Ua toatele tamaiti ua taina pese i totonu o latou ekalesia e pei o le Metotisi, EFKS, Katoliko ma isi lava ekelesia ae o le isi vaega e sili ona tāua i lea aoga ona o loo tatala le avanoa i soo se tamaititi aoga mai soo se atunuu o le lalolagi o loo fia maua lea avanoa. O nisi o fanau sa taina na’o lesona a’o isi tamaiti aoga e ta le piano ma usu ma pese, auā o le tasi lea tāua o le aoga e lē gata i le a’oa’oina ai o fanau ia iloa ona ta nota pese ae ua a’oa’oina ai foi ma o latou leo ina ia paleni lelei leo ma nota o loo latou taina. I le saunoaga faafetai a le susuga i le faiaoga ia Polima Salima o lona valaauina e mai le Atua mo fanau lalovaoa ia a’oa’oina lea mo le taina o viiga o le Atua.

O lana faafetai foi i mātua i le lagolago malosi i le momoliina atu o fanau i aoga, ua le faalogologo tiga i le mamao o nofoaga ae ua naunau lava ia maua se luamanai manuia o fanau. O le talitonuga foi o le susuga ia Polima Salima e mafua ona lelei le tamaititi i le aoga ona o le tutu faatasi o mātua e lagolago lo latou taumafai. O le fua e te lulu o le fua foi lea e te seleseleina.

Susuga ia Polima Salima sa gafa ma le aoaoina o fanau i le taina o le piano

Susuga ia Polima Salima sa gafa ma le aoaoina o fanau i le taina o le piano

Tamaiti sa Taina Lesona i le Faaaliga

Sou Opapo, Evelina Fetu, Pule Fesola’i, Millie-Lei Hansell, Junior Utumapu, Cheralyn Sami, Tioata Junior Mailo, Leilani Ioane, Florence Mase, Tiaane Fesola’i, Pita Vaisagote, Georgia Schwenke, Diana Fareni, George Iakopo, Sigalu Sasagi, Luella Bracey, Valansea Fonoimoana, Destiny Gagaeolo, Zephaniah Auvaa, Xavier Setefano, Zindzy Vaisagote, Faapae’e Faamausili, Aleesha Mata, Deikjhan Asafo, Nora Nofoaiga, Susana Opapo, Jericho Avaiki, Vaimoana Mase, Alini Eli, Sarah Latu, Joseph Evani, Marie Kepaoa, Theodora Fomai, Canaan Setefano.