Ua faagasolo nisi o se‘i ma faapitoa a le kamupani telefoni a le Digicel mo vaiaso taitasi.
O le faiga masani e pei ona sa faagasolo i Samoa, peitai na saunoa le alii pule i fefaatauaiga a le kamupani le afioga ia Leaupepe Talai Junior Lene, ma ia ta‘ua ai o lea ua fiafia foi e faataunuuina lea faamanuiaga mo le mamalu o le atunuu i Niu Sila.
O le vaiaso na tea nei na amata ai lea faiga ma le faamanuiaga mo Aukilani.
O soo se taimi e tuu ai ma toe fafaga le telefoni a soo se tasi o aiga ma uo i Samoa i le $20, o le a mafai ai ona tuuina le suafa o le tagata i Niu Sila, i totonu o le se‘i ma manumalo ai i le ofu ma le pulou mo le aulakapi a le Manu Samoa.
O se faiga o loo faailoa ai ma taui e le kamupani le mamalu o le atunuu ma i latou uma o loo faaaogāina le auaunaga a le kamupani telefoni, i se isi foi auala e lagolago ai ma le Manu Samoa, ma saga faalauiloa atili ai a o sauni atu i le Ipu o le lalolagi.
O loo iai i Niu Sila nei le susuga i le alii pule le afioga ia Leaupepe mo le faagasoloina ma le faia o lea foi faapitoa a le kamupani a le Digicel.
O le vaiaso talu ai na manumalo ai nisi, ma o sui e toalua sa molimauina le tuuina aloaia i ai o la ofu ma pulou, o le susuga ia Lima Ieti Tualaulelei mai Apia, ae o loo alaala i Manurewa i Aukilani, ma le susuga ia Leiataua Sakaria Faumuina mai Faleasiu ma Satitoa.
E lei leva ona malaga mai le susuga ia Leiataua mai Samoa.
Ae o le susuga ia Lima o loo iai i se asiasiga mo aiga i Niu Sila, ma le manaoga faapitoa o le fia auai ma maimoaina taaloga o le Ipu o le lalolagi.
