Ua atoa i le tausaga nei le 20 tausaga o faagasolo pea le polokalame tāua a le Malo o le vaiaso o le Teuila, ae peitai o loo molimauina le faatumau o le fuafuaga e totogi tupe a pisinisi pueata video e latou te pueina ai ata uma o polokalame.
O loo iai se faagulemalie o nisi o lea au faipisini mai fafo ona o sona lagona e faapea sa tatau lava i le Malo aemaise le komiti o le Teuila ina ia fuafua ni totogi talafeagai ma fetaui mo latou pe a fua i seleni ua faatulaga atu mo le Teuila o lenei tausaga.
“E fai lava si taugata uso o tupe nei ua fai mai e totogi atu, ae a e silasila i ai pe faatau matou ata i le atunuu i fafo e le taitai sikuea seleni o loo matou malaga mai ai auā o le isi tāua o le matou galuega faalauiloa o le siitia ai o lagona o o tatou lava tagata e agai mai i le atunuu i taimi o le Teuila ma sasaa mai a latou seleni, ae faapena foi i tulisi latou te maua ni ata oa matou polokalame”.
O le lagona lea o se alii fai pisinisi video mai Hawaiii ua musu e faasalalau lona suafa ina nei fetoai ai ma ni puapuaga ise isi tausaga e malaga ai i Samoa e tapue ni ata o isi polokalame ma sauniga a le atunuu e pei o le sisiga fu’a Ii tausaga taitasi.
O le faatulagaina o totogi o lea galuega o loo faia e le komiti mo faasalalauga faalauiloa o le Teuila. O seleni o loo totogi e le au pueata video faipisinisi e eseese lava e fua i le maualuga o le fiafia o tagata e silasila i polokalame e pei o pesepesega o pese lotu ile aso Sa, le tatalaga o le Teuila, tauvaga o le sailia o se tausala o Samoa, tuuga fautasi, faiga o suavai ma gasese isi taumafa a le atunuu ma isi lava polokalame e pei o siva ma pese faaleaganuu.
O le tausaga nei ua iai se faaopoopoga i polokalame e pei o le koneseti pese o le raga Muffin e malaga mai ai tagata pepepse lauiloa i fafo faapea ma Samoa.
O se tasi o polokalame ua aofia i le totogi o le pueina o ata video mo pisinisi e faatau atu ai ata o le Teuila.
O le maualuga o le totogi e $5,000, pe afai o polokalame uma e pei ona faaalia e le ofisa o le Pulega o Tagata tafafao mai fafo.
O le totogi pito ifo i ai o le $3,000 ma le $2,000, ae pe afai e manao le tagata pue video mo isi polokalame e pei o le Tausala Samoa ua ta’ua e se molimau e mautinoa o le a maualuga atu se seleni e totoi.
O le mafuaaga lea o le tomumu ua faalogoina i le faipisinisi pue video na talanoa mai, ona e lē o taotasi se totogi i se tausaga mo i latou pe a oo i le Teuila.
O le vaiaso nei o loo faagasolo ai polokalame masani o lea e taualuga i le sailiga o se Tausala o le atunuu.
O le Aso Tofi o le vaiaso nei le tuuga fautasi lea e na o le fitu Sa ua faamaonia e auai. Ua lē alu le isi fautasi ona ua lē totogia le lesitala.
Ua mae‘a ona faia se‘iga pepa mo laina o le tuuga ma sauni kapeteni i le sailiga o le siamupini lea o loo umia e le fautasi o le Tolotolo o Tama Uli mai Salelologa Savaii.
