Taugata tele le eletise ma le tau o le soifuaga ae o loo iai le suavai

O le faamuamua ua ave i le vaiaso o fonotaga a le Tautua Samoa na toe faamanatu ai lava le manaoga ina ia tuuitiitia le siisii pea o le tau o le soifuaga i Samoa nei. O se tasi o ia tuualalo ua faasino i le taugata tele o le tau o le eletise. O lea ua 81 sene i le unite e tasi lea e faatau atu ai le eletise i le atunuu.
O le mafuaaga lava ona o le taugata o le suauu o loo gaosi ai le eletise i Samoa. O le tatalaga o le afi tele fou i Fiaga – na ta‘ua e le Itu Agai, e lē o iai se faamāmā avega o iai ae ua atili ai ona maualuga le tau o le eletise talu ai o le taugata.
E $60 miliona tala o loo faaalu e le Malosiaga tau Eletise le EPC e faatau mai ai le suauu mai fafo i tausaga taitasi.  O se faiga ua ta‘ua e le Tautua Samoa ua taugata tele ma o le a faaauau lava ona alu i luga ona o le taugata o lenei puna‘oa faalenatura.     “Ae o lea lava e i Samoa le tali o lea faafitauli,” o le faamatalaga lea a le Taitai o le Itu Agai, le Afioga Palusalue Faapo II.
O se faaopoopo a le alii faipule o le Faasaleleaga, le Susuga Papalii Li‘o Taeu Masipa‘u, na ia faaalia ai le tāua o le agai o le Malo e faalelei ana feutagaiga ma afioaga e pei o Vailoa Palauli ma Sili i Savaii, o ni afioaga ua matuā tele le vaitafe o loo maua ai ma o loo agai sa‘o lava lea suavai i le sami e aunoa ma le faaaogāina i le tele o atinae e pei ona iai le manaoga o le Malo. “Maimau lenei suavai ae tatau ona faaaogā i galuega ma atinae ia ua taumafai i ai le Malo,” o se faaaliga lea a Papalii.
Ta‘ua e lea alii faipule o le Tautua Samoa, ua tele tausaga o taumafai le faigamalo a le HRPP ina ia faamautu ni feagaiga ma afioaga nei auā le faaaogā ai o le suavai aemaise i galuega a le EPC, peitai e lei iai lava se tasi ua tulai mai ma maimau ai lava lea puna‘oa.
“O le faafitauli,” o se faaaliga lea a Palusalue, “…ona o loo agai mai lava le Malo e talanoa ma afioaga nei ae o loo iai le manatu o meatotino a le malo suavai mai i vaitafe, ae ana iai se manatu foi lea e feutagai ma tagata o nei afioaga ma itumalo, ma e tatau ona aofia sui o afioaga nei i se komiti e vaaia puna‘oa nei, atonu ua maluelue mai afioaga i se finagalo o le Malo,” o le faamatalaga lea a Palusalue Faapo II.
“E tatau ona silasila le Malo i ni sea (shares) o afioaga nei i totonu o nei atinae, ia iai le manatu foi lea o tagata, o meatotino nei ua faasino ia i latou ma e tatau ona iai so latou sao i le puipuiga ma le faaleleia o nei nofoaga,” o se faaopoopo mai lea a Papalii Li‘o. “… e tatau ona iai se “sense of ownership,” saunoa Papalii. Faaalia e le Tautua Samoa, e lē malamalama pe aisea ua umi ai ia feutanaiga ae o lea lava e lē o faaaogā le suavai ma o loo faaauau ai lava ona taugata le eletise. “E taugata le suauu, taugata le eletise, taugata ma le tau o le soifuaga,” o se faaaliga lea a faipule o le Tautua Samoa.
O le faaiuga o le vaiaso lea na tatala ai le afi tele a le Malo poo le EPC lea e i Fiaga, i Aleisa. O le vai i Fuluasou i uta atu o Ululoloa lea e faasoa mai ai le suavai maua e agai atu i afi nei ina ia mautinoa le faalautele o le auaunaga i vaega o Samoa e lei atoatoa i ai lea faamoemoe.
Ua faaitiitia foi le faalagolago lea sa iai le tele o le atunuu i afi ia sa i Tanugamanono ona o lea ua tele le galuega ua faatautaia i Fiaga mo lea faamoemoe. O le tau atoa o lenei galuega e $100,000 Amerika. O le afi foi lea o loo alu i le suauu lona gaosiga o le eletise. O le taimi lenei e tusa ma le 60% o le eletise maua i Samoa e gaosi mai i le suauu ae o le 40% o loo gaosi mai i le suavai ma le malosiaga o le la.