Ua toe a’e foi lesi tausaga a’oga, ae o loo feeseesea’i lava le pulega o le aoga a Pesega fou i Vaitele. Na molimauina ai le o atu o faiaoga tipi ese le loka o le faitoto’a o le pa na loka mai ai ile tausaga talu ai, e le isi vaega o le pulega. O le manaoga o faiaoga, ina ia tapena le faleaoga mo le toe amatalia o aoga ole 2020. Peita’i e o ese faiaoga ma le lotoa e o ile fale i lea afiafi, ae o atu lesi vaega ole pulega, tipi ese le loka a faiaoga ae toe faatautau le isi foi a latou loka. Ua pei ai ose mea ula i tua’oi o lea pitonuu e tu ai le faleaoga. Ole afiafi ole aso Faraile, 24 Jan 2020 na molimauina ai le faatasitasia ai ose vaega o faiaoga ma matua ile lotoa ma faia moa ga vao, ma saga faamama atili le faleaoga mo fanau ile vaiaso nei.
O ai tonu lava e ona le fanua male faleaoga o Pesega fou ua afua ai lea feteenaiga, o le fesili lena e le’o mafai ona taliina ile taimi nei, talu ai, e lei maua lava se fesootaiga ma lesi itu, lea o loo tuuaia ile lokaina o faitoto’a ole pa u’amea o loo sio ai le malae ma le faleaoga, na afua ai foi ona vave tapunia le aoga ile tausaga talu ai.
Ole faleaoga o lea ua tusa ma le afa tausaga talu ona uma lona umusaga, ma na auai le afioga ile Palemia, ma le Minsita o le Matagaluega o Aoga, Taaloga ma Aganuu, i le sauniga aloaia na tatala ai. E manatua lava lena foi aso o le umusaga o le faleaoga ile tausaga talu ai, sa lagona ai lava foi le gugulu o se vaega o matua faasaga lava ile pulega. Peita’i ole pele o fanau aoga ma le manaoga ia aooga pea fanau, na oo ane ai lava i masina faai’u o le tausaga o iai pea tamaiti na aooga ai i Pesega fou.
Na faamatala e le tamaitai faiaoga o taulamua ai nei ile tapenaga ole falea’oga, ole tulaga ua iai latou, e le’o kea lava pe maua ni totogi pea leai, ae ole manaoga ia ave le avanoa i fanau, e aooga ai. Na ia toe tepa i le mea na tupu ile faaiuga o le 2019, “na faatuua faamalosi lava le aoga e le’i oo ile taimi e tuua ai aoga, ina ua usu atu faiaoga ma tamaiti i le taeao ua tautau mai ai le loka. E tuua Pesega ae le’i oo ile taimi na faatuua ai aoga, ile pepesi o le misela.
Ma o le lokaina mai lava lena o le lotoa a le aoga lea faatoa oo atu iai faiaoga i le vaiaso talu ai, ma tipi ese le loka, ae sei tapena. Na ta’ua foi e le faiaoga, o le alii Loia na ia avane le pule ia latou e tapena ai le faleaoga. Peita’i e le’o uma ai le vevesi o mafaufau o faiaoga talu e l ’o mautu ane lava le tulaga tonu o le faleaoga.
Ole taimi na loka ai foi le lotoa ile tausaga talu ai, sa na o le faatalitali lava le latou mea na fai ma tamaiti i lalo o tamaligi ma sa fesoasoani ane iai le faleoo ole Survival Foundation Mission, a le Susuga Tuilaepa Mary Grey ma le vaega, e tali le aoga ma faiaoga i lena taimi. Ae aga’i atu se vaega o faiaoga ile ofisa o leoleo i Faleata e soalaupule le latou matupu.
Peita’i e le i toe mafai ai lava ona tatala le faleaoga, ona o le puipuiga ole saogalemu o tamaiti mai le isi itu o le pulega. O ta’ua e le tamaitai faiaoga, sa fautuaina latou e leoeo, “e sili ona faataape le aoga, mo le puipuiga o le saogalemu.” Ma sa faapena ai lava ona faia, e oo mai ile vaiaso talu ai, lea na faato’a toe matala ai le loka lenei, ina ua avane le pule e le loia, pei ona ta’ua e le faiaoga.
“O le taimi nei, ua mana’omia ni faiaoga, mana’omia foi ona faalauiloa i matua, mo le lesitalaina mai lea o fanau, e na’o le $20tala le lesitala. E tatala ane le faleaoga ile tausaga talu ai, na oo i le 200 fanau, mai le vasega 1, 2, 3, 4 ,5, 6, ma le faamoemoe e faia se vasega 7 ile tausaga nei, ma se vasega 8, ile agai atu i luma.”
Peita’i ole tulaga lava ia ile totogi o faiaoga, o le’a faataatia atu lava i le vasega a le PTA, poo le faalapotopotoga a Matua ma Faiaoga, lena tulaga. O tausaga aoga uma lava, e faia ai vaevaega a le malo, o tupe faasoasoani mo aoga uma ile atunuu, e aofia ai ma aoga tumaoti, ma aoga faata’ita’i. O tupe na e fesoasoani i galuega faaleleia o faleaoga ma a latou pili totogi.
Ae o le aoga lenei a Pesega fou, o le lona tolu ai lea o nofoaga ua sii iai talu ona aveesea mai vasega laiti mai le malae ole lotoa a le Ekealesia a Iesu Keriso o le Aupaia o Aso e Gata Ai i Pesega. Na faasee ane ai i le isi ituala, uma lena faasee i tua atu ma faauaau ane ai, ma masii atu ai loa i fanua ole malo i Vaitele uta pei ona fausia ai lona faleaoga ma pa uaea o loo si’omia ai. E tasi le faleaoga ua mae’a o loo faofiofi ai vasega nei e 6, ae o loo taoto pea lesi faleaoga o loo faalava ane i lesi pito o le lotoa, toeititi foi mae’a atoatoa. E faataape le aoga ile tausaga talu ai, e le’o tofu le vasega ma le faiaoga, e le gata ilea o loo iai foi taimi galue o faiaoga e lei totogia lava. O le a taumafai pea e tuliloa poo ai le isi vaega o le pulega lea na lokina le pa ole faleaoga, mo se sosoga o lenei lipoti ile vaiaso fou.
