E fai lava si toatele o tagata mai atunuu eseese sa latou molimauina ma momoo i le keke puaa ma oka faa-Samoa, i le aso sa faapitoa lava mo le faalauiloaina o nisi o taumafa a le atunuu i totonu o le fale mataaga i Aukilani (Auckland Museum).
O se polokalame sa tuufaatasia e le Fale Mataaga i Aukilani, ma o loo faaauau pea seia faato‘ā faamae‘a i le masina o Oketopa o le tausaga nei lava.
O lea fuafuaga, sa maua ai le avanoa faapitoa mo Samoa e faatino ai le gaosiga o nisi o matai ai, ma taumafa a le atunuu, ma tufatufaiuna mo le tofoina e tagata uma sa maimoaina.
Na o Samoa le atunuu o le Pasefika sa faataunuuina lo latou sao mo lea foi polokalame tāua tele. Sa matuā saausi le silasila ma le maimoa a le toatele o isi atunuu, ae gaioi le susuga ia Michael Meredith e faatino ma faamatala le faiga o le oka ma le keke puaa.
Na amata mai lava le faiga o le oka i le taeina o le popo, ma vaega uma lava mo le tuufaatasia, seia oo lava ina pasi ma tufatufaina mo le tofoina.
Sa faapena foi le gaosiga ma le faiga o le keke puaa, ae na umi le taimi sa gasese ai, nai lo le taimi na tiliva mai ai i le aofia, ma faaaogāina loa. E lei fesiligia e tagata mai Asia, papalagi, o tagata uli, ma le tele o atunuu sa iai i lea aso, ae na o le talia lava ma le faafetai.
O le susuga ia Michael Meredith, o le alo o Samoa sa ia faatinoina le faiga o taumafa, ma o ia foi o se alii sa ia mauaina se faailoga i totonu o Niu Sila i le tulaga o le kuka (Chef).
E iai nisi faaopoopoga matagofie sa faamanogi atili ai le faiga o le oka nai lo le faiga e masani ai lea foi taumafa a le atunuu.
O se vaega o le autalavou a le ekalesia EFKS mai Glenfield i North Shore sa latou usuina le Vii o le Saolotoga o Samoa i le taimi na amataina ai le faamoemoe.
Na mae‘a lea ona sosoo ai lea ma le faiga lotu sa taitaia e le susuga i le faafeagaiga mai lava i le ekalesia a Glenfield, ona amata ai loa lea o le faatinoina o taumafa a le alii kuka lauiloa o Michael.
O le autalavou lava a Glenfield sa faafiafia i le tele o siva ma pese Samoa, aemaise o le tufatufaina o taumafa mo le toatele o tagata eseese sa auai i lea aso.
Na faaiu le aso faapitoa lava mo Samoa, i se tasi foi o au kuka sa latou faatinoina le saka faalifu fa‘i, ae sa amata mai lava foi i le fofoeina seia oo ina vela ma tofo loa e le au maimoa.
O Aso Toonai uma lava e oo atu i le masina o Oketopa lea e faagasoloai pea le polokalame, ae o le a agai mo le faalauiloaina o taumafa mai isi atunuu o le lalolagi.
