“Ua avea nei a‘u o Levaopolo Talatonu, e fai ma sui o le Aiga Sa Levaopolo ma Alii ma Faipule o le Itumalo o Gagaemauga Nu 2, matou te tuuina ai la matou tagi i le Tulafono faasaga i le Alii Palemia, Susuga Tuilaepa Sailele Malielegaoi.
O lenei talosaga tusitusia ua matou avatu ai i luma o lau afioga i le Loia sili mafuaaga o lenei talosaga, ona ua matou manatu ma talitonu, ua matuā solia e le Alii Palemia tulafono mamalu o le Malo Tutoatasi o Samoa”.
O se vaega lea o le tusi a le faipule na ave i le Loia sili le afioga Aumua Ming Leung Wai, i le faaiuga o le vaiaso ua mavae.
O le tusi a le alii faipule ua ia faailoa ai i le Loia sili o lafoga tau faifai a le alii Palemia e ala i le faaleoina o le suafa matai o lona aiga o loo ia umia o se taufaaleaga.
Ua ia faailoa foi i le Loia sili o le a ia tuuina atu i le faamasinoga, leitio faasalalau o le 2AP ma le Talofa FM sa faia ai ia lafoga i polokalame o faatalatalanoaga a sui o ia leitio ma le Susuga Tuilaepa Lupesoliai Sailele Malielegaoi.
O le fonotaga ia Iulai o le tausaga nei a le Palemene o loo faaalia e Levaopolo na ia faamanino ai i le faafofoga a le maota fono ma sui faipule faapea Samoa atoa le faaleoga sa‘o ma le tonu o lona suafa matai atoa ai ma lona faamatalaina o le mafuaaga ma le uiga.
Peitai o lana mātau e sa‘o uma lava faaleoga a faipule ma le Fofoga Fetalai ae e ese ai le Palemia.
O lana mātau foi ua lē faatasi ae fai soo ia faaleoga ma ua lē matagofie i le faafofoga a lona aiga ma lona nuu e faasino i ai le suafa Levaopolo aemaise o le itumalo o loo fai ai o ia ma sui usufono.
I se talanoaga ma le faipule na ia faailoa ai e lē o tupe le mafuaaga o lana su poo le tagi ae o loo naunau e faasa‘o le sese ma ia mulimulitai le Palemia i tulafono a le Malo o Samoa auā o se tasi o taitai e naunau e tausisia tulafono a le atunuu.
“E tasi sene la‘u su, lona uiga e lē o iai so‘u manatu e tatalo mo ni taui tupe i le faaleagaina o le suafa matai o lo matou aiga, ae ia faia le amiotoni auā o tulafono na fausia e le Palemene e tatau ona usitaia ma faamamalu uma i ai tagata e aofia ai le alii Palemia”.
O le isi talanoaga a le taitai o le Malo ma le leitio o le Talofa FM i le vaiaso ua mavae na saunoa ai Tuilaepa ma ia faaalia o lana faaleoga e faasino i le taaloga piliati ma le taaloga faatavale polo.
“A faga la‘u polo e alu atu alu i le va o polo; a e faataavaleina foi le polo e tatau ona alu atu tau i le polo pa‘epa‘e ona maua lea o ou ‘ai”, o se vaega o lana faamatalaga.
Peitai e talitonu Levaopolo e lē o le sa‘o tonu lea o le lafoga na faaleo ai lona suafa matai ma o le mafuaaga autū lea o lana talosaga i le Loia sili e faia se suesuega faatasi ai ma leoleo o le alii Palemia.
E tuuina atu lenei lipoti mo le faasalalauina o loo malaga le taitai o le Malo i le fono faaletausaga tele a Malo Aufaatasi ma ua lē maua ai mo sona finagalo.
