Tauave Toomaga o Tagata Puapuagatia fesootaiga mo fanau ua vaetama

O le faalapotopotoga o le Toomaga o Tagata Puapuagatia le Samoa Victims Support Group o le a nafa ma le faia o fesootaiga i le va o matua i Samoa ua vaetama a latou fanau e nisi o ulugalii i Amerika lea sa faagaioi e le ofisa sa vaetamaina ia fanau a le atunuu, o le Focus on Children. E selauafe tala tupe Amerika o le a maua e le Toomaga o Tagata Puapuagatia, i totonu o le lima tausaga mo le faia o fesootaiga i le va o matua i Samoa ma a latou fanau ua vaetamaina.
O lea seleni o se faasalaga mo tagata e toalima sa galulue i le Focus on Children ua faamaonia i le faamasinoga i totonu o le Iunaite Setete lo latou faia o ni folafolaga le moni i tuugatala ma matua na ioe e ave a latou fanau e vaetama e ulugalii Amerika sa fia maua ni fanau. O le Aso Lulu nei o le a taunuu ai se tasi tamaitai na vaetamaina i le faamoemoe e asiasi i ona matua moni, lea o le a malaga mai ma ona matuafai faatasi ai ma se au pueata o le faletelevise o le CBS i Amerika o loo pueina se polokalame e faatatau i le vaetamaina o fanau mai Samoa.
O lenei mataupu e pei ona silafia sa amata ona lagalaga ai le tele o finagalo o nisi, ona e foliga mai sa lei matua malamalama lelei le toatele o matua ua aafia ai i lenei mataupu, i le auala tonu na faaupu mai ai lenei polokalame ia i latou. E pei ona taua i nisi o tusitusiga ua tuanai, atonu o le ata sa faailoa atu i le toatele o nei matua e i latou na momoliina atu le feau i Samoa, aemaise foi o nisi lava o tagatanuu Samoa sa fai ma sui o lea faalapotopotoga e feagai ma aiga Samoa na faataunuu i ai lenei mataupu, o ina na tulai mai ai se faafitauli, ona e foliga e ese le tala lea o loo faailoa i matua i Samoa nei, ma faigofie ai ona mamulu nai fanau, ae ese ma le tala o loo faalauiloa i Amerika i ulugalii sa fia maua ni a latou fanaufai.
E iai foi nisi o tagatanuu Samoa na molia ai i le faamasinoga Amerika i lenei lava mataupu, ae le toe maua lelei i ai se faamautinoaga i le iuga ua oo i ai lea mataupu. Na pau lea o se tala fiafia, o le a mafai ona toe maua se fesootaiga a nisi o nei fanau na vaetama ese, ma nai o latou matua o loo nofo tatali atu i Samoa.