Tauaofia Divine Mercy i le semina a Kasiano Leaupepe

Na malaga mai Samoa le afioga i le tiakono o Kasiano Leaupepe ona o ni tuatuagia faaleaiga. 

E ui ina sa utiuti le taimi ona o ni faamoemoe tetele sa feagai ai, ae faigata ona talitualimaina le faatalauula mai a le afioga Patele Maurice Thompson, le tamā faaleagaga o le Divine Mercy, mo se avanoa e faia ai se semina mo lenei mafutaga paia.

O Kasiano poo Kazz pei ona lausilafia ai e le tupulaga, ua fasefulu ma le ono tausaga talu ona galulue i le Ekalesia Katoliko Roma.

O se tasi lenei o poutu iloga a lenei Ekalesia, e lē gata i tiute e masani ai fesoasoani ma o latou faletua, ae o le faatinoina poo le taleni lē aumaua o le faatinoina o semina.

I le aoauli o le Aso Sa na tuanai, na tauaofia ai le Divine Mercy, i le malumalu Katoliko i le aai o Ruse i Sini i Sisifo, i le fia molimauina o lenei toa o le atunuu, i ona faiva ua lauiloa faamanuiaina ai e le Atua. Na maualuga foi le faamoemoe ona o le faatasi atu o le afioga Patele Maurice, faapea aao tusitusi o olo e ono a le mafutaga.

O le failautisi poo le faauuluuluga a le Divine Mercy o le faletua ia Akenese Leatuavao, lea ua lua tausaga i lenei tofi fita. O failautusi o olo taitasi o i latou foi o loo galulue ma le faamaoni e lagolago atu i le faletua ia Akenese, mai Rooty Hill afioga Tofilau Metita Mealamu, Ruse: Laulii Fuamatu, se tasi o alo e faasino i le afioga i le tiakono, Bankstown Tafale Hicks, Lakemba Palepa Galuvao, Panania Telesia Scheafhausen, ma New Castle Carol Su‘a-Laupama.

O mātua faufautua o le afioga Sala Mauga Andrews ma le faletua ia Nive. Na faatasi foi afioga i le Peresitene o le ituaiga a Sagata Maria, Ulugia Lesi Petaia, ma nisi o o latou sui. 

Na muai faafetaia e Kasiano le mafutaga ona o le amanaia atu o ia, ae pagā e lei manatu e iai se avanoa e faia ai ni semina, ae o le a taumafai pea i ai. O le autū poo le mātua o lana semina, e sii mai i le tusi a Kenese, “O Galuega Faatinoina a le Atua”.

Na faaiuina le semina i le saunoaga faafetai a Patele Maurice, ona alo atu lea i se taumafataga tele ma faaaloaloga faaleaganuu na saunia e le mafutaga paia a le Divine Mercy. Na matuā silamio, ma logo i tino matagi lelei le mafutaga i le mauoloa o lenei toa o le atunuu, ua lē uma le taliga fialogo i le loloto o lona silafia.