O le ‘ava Samoa ma le koko Samoa isi laau ua talosagaina nei e le Faipisinisi maumea mai Saina lea ua suafa matai i Samoa nei, Tupailelei Jack Chen ina ia faaputu ia tele ma avatu i Saina. O nisi o fua o faaeleeleaga ua manaomia e lea alii le ave ma faatau atu i lona atunuu.
E ui i lea manaoga ua fautuaina e se tasi o faipisinisi na iloga le mafatia ina ua taofi le toe faatau atu i fafo o le ‘ava Samoa, le mamalu o le atunuu ua iai se manaoga e toe foi e totō le ‘ava Samoa ina ia vaavaai lelei lava ne‘i toe tulai mai mafatiaga i lea foi laau i tausaga ua mavae.
E pei o le tele o fua o le eleele i Samoa, ina ua amata ona faatau le ‘ava i maketi i Europa, na matuā iloga le faamanuiaina ai o le atunuu, ae alu a‘i, alu a‘i, te‘i lava ua alia‘e se lipoti na faia e ni fale talavai i totonu o Europa ua faalauiloa ai faapea, o le ‘ava o loo avatu i le Pasefika e oona ma e lē lelei mo le soifua maloloina o tagata. O finauga na faapea ona matuā vevela ma iu ai ina faia‘ina atumotu laiti o le Pasefika ma taofi ai loa le toe faatau atu o le ava tu‘i mai Samoa ma isi atunuu o le Pasefika i maketi i Europa faapea ai ma Ausetalia.
E oo mai i le vaitau lenei, o loo faaauau le tapu a Ausetalia ma isi atunuu o Europa e faatau atu ai se ‘ava mai le Pasefika.
Na iai suiga o nei lipoti i tausaga e tele mulimuli ane ae faigata tele ua mae‘a ona faapea mai e faamaonia le saogalemu o le ‘ava ma oloa ua gaosi mai ai e pei o vai faapea ai fualaau, ae na ta‘ua e Eddie Wilson o le atina‘e gaosi oloa mo le faatau atu i Fafo o le Wylex e matuā leaga lava le vaavaai a tagata i le ‘ava mai Samoa ma isi atunuu o le Pasefika, ma ua oo lava i oloa ua gaosi mai ai ua faigata tele ona toe unai i maketi i atunuu mamao.
Ua faitau afe tausaga o faaaogā e tagata o le Pasefika le ‘ava ae e foliga mai e lē o talitonu lava atunuu nei e i Europa ma Ausetalia i ia mau ma ua faasā ai pea ona toe avatu se ‘ava mai i le Pasefika.
Ua toe foi lava le tele o toga ‘ava sa iai ina mamago ma ua lē toe faaaogāina seia vaganā ai le maketi i totonu o Samoa lava ia auā o loo faapea ona taumafa i le tele o taimi e le atunuu.
O lea la ua tatala le maketi mai le Malo Tele o Saina, ua tulai mai ai nei foi ma popolega aemaise le masalosalo pea pe agai foi i fea nei taumafaiga, o le toe foi e totō le ‘ava Samoa ae uma ane foi taofi mai e pei ona vaaia i le silia i le 10 tausaga talu ai.
Faaalia e le susuga Wilson, e toe aliali ane nei foi atugaluga lava ia na lāgā e Europa ma o le taimi lenei ua tatau ona galulue Samoa e unai le faafoi o le tauleleia o lea oloa faatau atu i fafo. Faaalia e lea tamalii e iai ana oloa ua mafai ona faamautu le ave i Saina ae e lē o aofia ai le ‘ava Samoa i ia oloa.
O le vaavaai lava i auala e mafai ai ona foia ma‘i o le tino e mafua ai le agai mai o Tupailelei Jack Chen i Samoa ma faalauiloa loa le manaoga lea ina ia aua ne‘i gata ai i le nonu, lea ua amata ona fua i Samoa, ae ia faaopoopo nisi laau e pei o le ‘ava ma le koko Samoa.
O le koko Samoa ua tele foi tausaga e lē o toe faatau atu i fafo. Ae o le tasi lea o laau e lei motu lava le totō e tagata ona o le toatele lava e taumafa le koko ma e moomia lava foi i le tele o oso a aiga pe a malaga nisi i atunuu mamao.
O lea lava la e iai togakoko peitai e lē o toe tele e pei ona iai i aso ua tuanai. O lea foi la ua tauanau mai e le kamupani a le alii Saina e pei ona ta‘ua o Chen le tatau lava i le atunuu ona agai e faatino ia atina‘e auā e faaauau ona agai mai i Samoa e avatu ia laau poo fua o laau.
E toaitiiti lava na mafai ona la‘u a latou koko ua mae‘a ona faamalū i fafo. O se tasi o aiga na faapea ona faaauau le faalagolago i le koko mo le tupe maua o le Afioga lea a Vaai Papu Vaelupe. O le atina‘e lenei na lauiloa ai lona tuaa le Afioga i le aloalii, Vaai Kolone Vaai i le amata mai ai o ana atina‘e tau pisinisi – o le togakoko.
E oo mai lava la i le taimi lenei ua vaaia e le afioga Vaai Papu le pisinisi a lona aiga, ua faaauau ai lava le auina atu o le koko Samoa i atunuu mamao aemaise i Niu Sila. E ave lava le uta lea e tusa ma le $5 tala Niu Sila i le kilo o le koko ua mae‘a ona faamalū.
O Amerika lea na ta‘ua e Vaai Papu e tele atu le tupe e maua ai ae e fua lava foi i le koko e mafai ona tu‘i ma faamalū ma avatu i maketi i fafo.
E lē o iai se maketi i le maualuga o fefaatauaiga faale Malo ae o loo agai lava aiga latou e faatino le faiga faamomoli o koko Samoa mo le faatau atu i fafo. Faaalia e Vaai Papu Vaai, e tele lava le tupe lelei o le koko peitai e lē o taitai ona lava le koko e fafaga ai maketi nei pe afai e tatala mai mo tagata o Samoa.
O lea ua lagolagoina e Vaai le tulaga ua iai nei le maketi lea ua tatala mai i Saina ma le faamoemoe o le a alu alu a‘i ai faapea.
