O se polokalame tau aoaoga i le va o le faalapotopotoga o le Matua i le Oo poo le Meti i Lalovaea na malaga mai ai ni tamaitai talavou mai le atunuu o Kanata i le tausaga e 2007 i Samoa. O se polokalame e faamasani ai i le soifuaga i Samoa ma isi vaega o le siosiomaga o le tatou atunuu. O le polokalame lea na malaga mai ai ma tamaitai e toalua na tatala le latou masaniga ma se alii sa faigaluega i le Meti ma faaauau ai pea le mafanafana o lea masaniga.
O le masina o Iulai i le aso 28 o le tausaga e 2007 na alu ai se tafaoga a nei tamaitai ma taulelea e toalua i le faleaiga o le Hot and Spicy.
Na mae‘a ona agai lea i le fale kalapu o le Crabbers i Tauese i Apia. O le tafaoga lea na suamili ai tala ma inu nai a latou meainu malolosi ma pia seia oo ina fai le tonu o le a agai i se faletalimalo.
E toatolu tamaitai ma taulelea e toalua, ae ina ua mautu le tonu na faailoa e le tasi o tamaitai e sili pe a o i se taxi i le faletupe o le Westpac i le masini tala tupe e aumai ai se seleni e totogi ai se potu o le faletalimalo o le Tatiana Motel i Fugalei lea na faaiu i ai le po.
I molimau a taulelea e toalua na molia na la faaalia ai, sa malilie tamaitai e toalua na faia le tagi i leoleo, e o i le faletalimalo.
Sa malilie foi i le faigaaiga na faatino ai, lea na momoe ai le isi o taulealea ma le isi tamaitai, a o le isi tamaitai ma le isi taulealea. Peitai sa molimau i laua na tagi e lei iai so la maliega i le mea na tupu. Sa onanā ma niniva ona sa tele se avamalosi sa la inumia.
Ae peitai i le molimau a le tasi o taulealea na ta‘ua ai, na malama le taeao o le aso na sosoo ai sa o lelei lava ma nei tamaitai momoli i le aiga sa faamautu ai, e aunoa lava ma se feteenaiga na tulai mai. O se laulau o faatonu e aofia ai ni alii se toalua ma ni tamaitai se toalua sa nafa ma le iloiloina o molimau.
O le mae‘a o iloiloga a le laulau o faatonu na fofogaina ai loa le faaiuga o moliaga o le faiaiga faamalosi ma faapea ona faaleaogāina ai moliaga.
O lona uiga ua faamamāina suafa o ia alii e toalua mai le solitulafono sa tuuaia ai. O loo iai le tapu a le faamasinoga i le faailoaina o suafa o tamaitai ma taulelea e toalua sa aafia i lenei mataupu ma o le mafuaaga foi lea o le lē faailoaina e le tusitala.
