Taualuga polokalame a Vili mo le fanau aoga

E masani ai ona faia ni polokalame fesoasoani a le susuga ia Vili – ma lana fale koleni poo lana kalapu foi, mo le toatele o fanau aoga, pe a tuua aoga.

E lē gata i vaituuaga o le tausaga, ae faapea foi le vaitaimi o le tuuaga umi i faaiuga o tausaga taitasi.

O ia polokalame e faatatau lea ina ia mautinoa e lē o agai fanau ma tupulaga talavou i nisi faafiafiaga lē talafeagai, e mafua ai taupulepulega leaga e iu ina faatino ai nisi tulaga lē manuia.

E talitonu le susuga ia Vili ma nisi sa tuufaatasia lea polokalame i tausaga uma, o se faiga ma se auala ua vaaia ai ni faamaoniga o le agai i luma ma le faaaogā tatau e tamaiti ma le fanau o lea avanoa.

Ua lē gata i lea a ua mafai ai foi ona maua pea le fesootaiga ma mātua, auā e leai se isi nofoaga tāua e saili i ai, ae saili tonu ane lava i le fale taalo ma le polokalame e pei ona faagasolo.

O le vaiaso talu ai na molimauina ai foi e le toatele o aiga ma mātua o fanau sa latou faaaogāina lea fuafuaga tāua tele, le faaiu ai o le polokalame sa amata mai ina ua mae‘a le Kerisimasi ma le tausaga fou.

O le polokalame sa aofia ai taaloga, faamalositino, o koleniga e oo lava foi i faipelega i totonu o le maea, ma le tele lava o isi gaioiga sa faataunuuina e fesoasoani ai mo le faatumauaina o mafaufau o le fanau i tulaga moomia o le soifuaga, nai lo le feoai solo i le auala, ma le aofia ai i kegi ma taupulepulega leaga.

E toatele le faitau aofai o le fanau sa auai, faapea foi nisi o tamafanau a le atunuu sa fesoasoani malosi ia Vili ma le faamoemoe o lenei foi tausaga ma lona tauamataina.

O gaioiga uma lava sa faatinoina, sa faapea foi ona vaevaeina i ‘au e lua, ma faia ai ni faiga faatauvaga.

E masani ai ona saunia foi e le susuga ia Vili ma lana fale koleni faailoga ma ipu e faamanatuina ai ma tuuina mo le ‘au manumalo i tauvaga sa faia i totonu o le polokalame atoa.

O le faaiuga o lea polokalame sa tauaaoina ai le ipu mo le au manumalo, ma toe faalauiloa ai foi le isi vaitaimi tonu e toe amata ai le isi polokalame, i le taimi foi e tuua ma mālōlō ai aoga i le kuata muamua.

Na taualuga lea aso i se faiga‘ai tele e pei lava foi ona masani ai sa saunia lava ma tapenaina e le susuga ia Vili ma lana kalapu, ma le polokalame.

Sa faailoa foi le fiafia tele o le susuga ia Vili, aemaise ai o mātua e ona fanau, ona o le solosolo manuia, ma le agai pea i luma o le faatāuaina o lea foi faiga.