O le malolo faatamalii a Toaletai David Tua i le sauai e pei o Koliata ia Alexander Ustinov i Hemilitone Niu Sila i le Aso Toonai, na faalauiloaina ai ma le ritaea mai o lenei toa o Samoa ma Niu Sila i faipelega a le lalolagi.
O se fusuaga ana manumalo ai, e iai se avanoa e fusu ai i Fusi o le lalolagi o loo umia e le auso Ukraine ia Vladmir ma Vitali Klitscko.
Ae peitai e ui o le loto naunau o le alo o le atunuu ia tauia le tapuaiga a Samoa ma Niu Sila ma soo se tasi i le lalolagi e lagolagoina ia, na faigata le maua o se avanoa e faaumatia ai Ustinov. Na manumalo uma le alii o Alexander i taamilosaga uma ae na taualuga le olaga fusu o Toaletai o loo ia umia pea le matati‘a o le aunoa ma le faia‘ina i se tu‘ioti ma ua mautinoa, o le auvae ma le fofoga aupito maaa ma malosi lea talu ona faavae mai faipelega.
O se ta‘utinoga lenei i le alo o Samoa auā o siamupini uma lava na umia le fusi o le lalolagi na malolo uma i tu‘ioti i vaitaimi o fusu.
Na gasolo foi i luga o upega tafailagi faamanuiaga ma alofaaga ma mitamitaga a soo se Samoa i tulimanu e fā o le lalolagi i le faailoa mai o le faaiuga a Tua.
I Ausetalia nei a o lei faia le fusuaga, na faailoa e le uo mamae a Tua o le siamupini foi o le Middleweight ia Lawrence Tauasa lona agaga, “Ou te tatalo ma tapuai ia manuia lau fusuaga uso.” O le masina talu ai na asiasi mai ai Toaletai ma api ia Tauasa ma lona aiga mo nai aso.
E ui o le malolo faaiu ma ua ritaea Tua, ae ua avea nei lana matati‘a ua faatuina ma sa taumafai ai i le 2000 mo le fusi o le lalolagi, e fai ma taiala mo se isi alo o Samoa ia ausia ma unaia ai e faataunuu mo le lumanai.
Talu mai le 1992 i taaloga a le Olimipeka i Barcelona, na matauina lava le avea o ia ma siamupini e ui o le faafitauli masani o le uumi tele o ana paga ma faigata na tuliloaina e le agavale maoa‘e o Tua.
O nei pine faamau o le a avea nei ma taiala mo alo talavou faia‘e e pei o Joseph Parker ma le alo o Vaaiga Tuigamala ia o latou faalauteleina ma fai ma faamalosiau i latou lumanai i totonu o le maea.
O le taimi muamua foi lea na usina ai ni vii se fā i se fusuaga muamua tasi mai le atunuu o Ustinov o Belarus ma le Vii o Niu Sila, Maori ma Samoa le atunuu pele na soifua ai Toaletai David Tua.
Faafetai Faafetai Faafetai Tele lava Tua!
