E toatolu ni sui o le au faafiafia a le aoga o matata eseese o le Don Bosco i Alafua ua molia nei i le toso teine, fai o solitulafono matagā, o le fai o solitulafono matagā i le tulaga muamua (first degree) ma le lepeti o le saogalemu o se teineititi e lei avea ma tagata matua ona o se mataupu na tulai mai i Amerika Samoa a o iai lenei aufaafiafia e fai ma sui o Samoa.
O le aoga lenei na faapea ona feagai ma le tele o faafiafiaga na avatu i Samoa mo le faamanatuina o le Fu‘a a Amerika Samoa i le vaiaso ua tuanai.
O le tele o tausaga sa faapea ona valaaulia afioaga peitai o le tausaga lenei na tasi lava le aufaafiafia na avatu i Samoa o le aoga lea a le Don Bosco ma na mataina lava taumafaiga a le fanau ina ua taualuga fiafia o le Fu‘a.
Ae o le tālia ai o le faataunuuina o taumafaiga a lana Auvaa, o isi foi fanau o le aoga na tolopo mai i le Aso Gafua a Amerika Samoa, le Aso Lua lea i Samoa na faapea ona nonofo ai lava ma le aufaafiafia seia toe foi faatasi mai i Samoa.
Ae e oo ane i le tuuga faatasi ua manumalo le Don Bosco 200 i le tulaga lua, ae amata ona auai nisi o le ausiva lava latou i le ofisa o leoleo ma le faamatalaga ua tagi se aiga o se latou teineitiiti ua faapea ona saili ae maua ma nisi o le au faafiafia a le aoga.
E oo i le toavalu tama aoga ma se faiaoga se toatasi na ave uma mo le fesiligia e leoleo i lea mataupu.
E mae‘a ane le tuuga faatasi a le Auvaa ua toaono i latou ua aafia, o le isi toatolu e aofia ai tama aoga e toalua ma le faiaoga e 27 tausaga le matua ua taofia ma ua molia ae o le isi toalua ua toe tatala i tua ma ua agai ane i le nofoaga o loo ua sauni ai le o ese o le aoga a le Don Bosco, i le afioaga o Utulei. O le isi toatasi ua taofia foi ae ua avea ma molimau a le Ofisa o Leoleo i Amerika Samoa.
O le tuutuuga e mafai ai ona tatala i tua i latou e toatolu ua molia e $100,000 Amerika.
O le afioga Taupa‘u Tau Toluono o le alaleo o le KSBS na faaali mai le faigata o lea mataupu ona na o ese lava le vaa na toe faafoi ma ai
le aumalaga a le Don Bosco ae ua taofia lava le fanau lenei e toalua ma le alii faiaoga.
O le unai ina ia vave ona faatautaia lea mataupu ma ia faapea ona maua ni loia e tulai mo i latou ia peitai talu ona toe taliu mai le aoga e lei toe tatala le aoga ma atonu o le vaiaso lenei o le a maua mai ai se tala aloaia i le faigamalaga lenei. Ona pau le tulaga mautinoa e lē o le Auvaa na aafia ae o le au faafiafia.
Na faaalia le lē fiafia tele o le toatele ona ua toe faaleaga lava le matagofie o taumafaiga a fanau i Amerika Samoa i lenei mataupu ma e masalomia na faapea ona fai se fiafia i le po na tulai mai ai lea solitulafono.
O se aumalaga foi i tausaga ua mavae o se aufusu a Samoa nei na aafia foi i se faafitauli faapea lea foi na tuuaia ma taofia ai e leoleo se alii fusu e toatasi ma se faiaoga o fusuaga mai i Samoa ona o masalosaloga foi o le fai o se faiga aiga ma se teineititi e lei atoa le 16 tausaga le matua ma o le solitulafono foi lea ua aafia ai sui ia o le aoga a Don Bosco.
