O le afioga i le tamaitai minisita o aoga, Anne Tolley, na ia tatala aloaia le alaleo 107.1MEPSFM a le aoga a Mangere East Primary School i Magele i le Aso Tofi na tea nei.
O se aso fiafia tele lea mo tamaiti aoga ma faiaoga faapea le pulega aemaise mātua, ona ua taunuu se tasi o a latou sini autu (priority goal) ina ia faatāua ma faaleleia ma siisii atili ai i luga le tulaga i le a‘oa‘oina o alo ma fanau i le gagana faalogo, gagana o fesootaiga, gagana tusitusi, aemaise le malamalama i auala eseese o loo faaaogāina i lenei vaitaimi ua tatou iai. O se fuafuaga sa faataatia mo le 5 tausaga, ina ia iai se nofoaga e ta‘ua o le information centre e iai faatasi ma se latou lava leitio. Tusa ma le 3 kilomita le mamao ma le malosi e oo i ai faasalalauga, e faapea foi ma ni masini laptop mo faiaoga ma tamaiti sinia ina ia faigofie ai a latou galuega o loo faaaogāina ai polokalame talafeagai.
E lē gata i lea o le uaeaina faapitoa lea o potu aoga i se auala (soundproof system) e mafai ai ona lagona uma faatasi e faiaoga ma tamaiti i taimi o mataupu.Sa tatalaina foi i lea lava aso nisi o potu aoga mo “O lou Ala i Malo Samoa Bilingual Unit”.
O le susuga i le faletua ia Malo Sepuloni o loo taitaia lea vaega o le aoga na ia saunoa e faapea o le viiga lava ma le faafetai e ave i le Atua auā o se aso fiafia tele lenei mo i latou uma aemaise le aoga atoa, e ui lava sa faaleagaina nisi o potu aoga i le amataga o le tausaga, e lē o faaitiitia ai lava le taumafai o le pulega, mātua ma faiaoga i o latou tiute auā le solo lelei o a‘oa‘oga a alo ma fanau. Na faaalia le fiafia o le fanau aoga e ala ia latou siva pese ma tauloto i lena taeao a o maimoa le valaaulia ma mātua.
Na faaiuina lea aso i se taumafataga felanulanuai ma le matagofie na saunia e mātua.
