I le afiafi o le Aso Faraile na se‘i mavae atu nei, o le toe Aso lea o le polokalame o le “13 Aso o Pesepesega o le Kerisimasi” lea sa faagasoloina i le nofoaga o le Ekalesia EFKS i Magele Puaseisei i Magele i Sasa‘e.
O lenei Ekalesia o loo tausia e le Susuga i le faafeagaiga ia Victor Pouesi ma le faletua ia Salome. O se vaaiga ina matagofie afiafi o aso taitasi i le tele o sao mai Ekalesia eseese sa valaauina faapitoa mo lenei tausaga mai lava i le uluai aso na amataina ai i lenei tausaga 2014 seia oo mai ina ua taualugaina.
Na molimauina i le tele o afiafi o lenei polokalame le faatumulia o le malumalu i afiafi uma. Sa maua le avanoa e faasalalauina tuusa‘o ai lea polokalame i luga o le ea e ala i le tautua a le Radio Samoa 1593am, ma maua mai ai e le toatele o loo fesootai mai i le upega tafa‘ilagi mai atunuu i fafo atu o Niu Sila, ma fesuisuia‘i ai auala o loo momoli mai ai le feau o le Kerisimasi e ala i siva ma faaevagelia atoa ai ma pesepesega faaleagaga, ua felanulanuai ai ma matagofie lea faamoemoe.
O lenei tausaga na malaga faapitoa mai ai le Autalavou a le Ekalesia EFKS mai Laulii mo lea faamoemoe, ma o se mitamitaga foi lea i le faafeagaiga ia Rev Victor Pouesi ma le Ekalesia ona o le sao a le autalavou mai Laulii ma ua osifeagaiga ai foi lea autalavou ma Magele mo isi polokalame i le agaigai atu i luma.
O lenei polokalame ua savalia nei le 5 tausaga talu ona faavaeina ma amataina mai le tausaga 2009 seia oo mai lava i le asō. Ma o loo molimauina le agaigai pea i luma o lenei polokalame mai lona faavae mai.
O loo mafai ona maimoaina lea polokalame i se tasi o alaata o le televise i totonu o Niu Sila i afiafi, faapea ai foi ma le auaunaga a le MOANATV o loo i lalo pulega a le Samoa Multimedia Group, o loo aafia ai ma Radio Samoa faapea ai ma le Samoa Times.
Sa taualugaina polokalame faaiu i lea afiafi i se taumafataga tele na saunia lava e le mafutaga a Tina EFKS i Magele Sasa‘e, ona ta‘ape fiafia ai lea o le toatele i lea po ma le loto faamalieina i pesepesega i le fanau mai o le Mesia.
Sa faapea foi ona faatasi ai i lea afiafi Pulega o nisi o Kamupani e pei o le le G-Mana Wholesale Autos, le afioga ia Galumalemana Tai Galumalemana, aemaise le pulega a le Pacific Ezy Money Transfer, le afioga ia Muliagatele Faimalo Allan Stowers, ma ua maualuga ai lea afiafi.
E faamoemoe e toe faaauauina pea lenei polokalame i le tausaga fou. Taupule ola ia lea tausaga i se faaopoopoga o lea lava polokalame; Soifua.