O le finagalo o alii ma faipule o Pitonuu i Satupaitea a o loma le faigapalota tele a le atunuu na faia i le aso 4 o Mati 2011, ia tapuai Aloiamoa Tua Savaii, ae tasi le sui tauva e ave i ai le lagolago o le afioga, Tavui Tiafau Salevao lea na manumalo.
Peitai sa tauva lava Aloiamoa auā o lana lea aiātatau i lalo o le Faavae o le Malo Tutoatasi, aemaise o ia o le isi matai lesitala o loo fai lana monotaga e agavaa ona avea ma sui tauva i le sailiga o se tofi faipule o Satupaitea.
O le lua vaiaso ua mavae na toe faaleaogāina ai le filifilia o Tavui Tiafau Salevao ina ua faamaonia tuuaiga a le sui tauva mai Satufia le susuga Asiata Wairaki.
O tuuaiga o faatosina faaalatua e lē faatagaina i le tulafono o faigapalota.
O le mae‘a ona fofogaina o le faaiuga ma avanoa ai le nofoa o Satupaitea i le Palemene, na fono ai loa alii ma faipule o Pitonuu ma faia ai le faaiuga e tafiese Aloiamoa Tua Savaii ma lona tausoga o Aloiamoa Faasalafa.
O le faamatalaga mai se tasi o le aiga, ua faatulai ese i laua ona e mafua i le palota tele. O le mafuaaga o le lē usitai i le finagalo o le nuu e tasi lava le sui e tauva e lagolago uma i ai.
Gugulu le nuu i le faaiuga
O le molimau a se tasi o le aiga o nai matai ua tafiese, o loo gugulu le nuu i le faaiuga ona e lē fetaui.
Ua gugulu foi le nuu ma aiga o ia matai ona na talanoaina le mataupu ma faia le faaiuga e lei auai Aloiamoa Tua ma Aloiamoa Faasalafa o loo aafia i le fono na faia i le Aso Gafua 6 o Iuni 2011.
“Ou te ofo i le mafai ona talanoaina lenei mataupu ma faia le faaiuga e aunoa ma se leo o matai o lo matou aiga ua faatulai ese”.
O le finagalo lē fiafia lea o se tasi o le aiga sa tuusa‘o i ai le fesili e tusa ai o lenei faaiuga.
O loo loma nei se aso e faia ai le palota laititi a Satupaitea mo le toe sailia o sona tofi faipule ina ua faaleaogāina le filifilia o Tavui Tiafau Salevao.
O loo iai ni masalosaloga o nisi atonu o le isi lea mafuaaga o le faia o le faaiuga, peitai e lei mafai ona faamaonia ia masalosaloga.
E lē o mautinoa ni molimau e faapea o le a tuuina atu e i laua ua faatulai ese le faaiuga ua faia i le faamasinoga e finauina ai le lē talafeagai.
O nisi o palota ua mavae a le atunuu sa toe faatonuina ai e le faamasinoga le foi i nuu ma afioaga o nisi o aiga ma tagata taitoatasi na tafiese ona o le palota i isi sui tauva ae lē o le sui na tasi i ai le nuu, faapea i latou sa avea ma sui tauva.
O loo tatali nei se aso e faasilasila mai e le Fofoga Fetalai ma le ofisa o faigapalota e faatino ai palota laiti a itumalo ua avanoa o latou tofi faipule ona o le taunuuga o tagi o le palota.
E 4 itumalo ua mautinoa ua leai ni faipule, e pei o Satupaitea, Vaisigano Numera Tasi, Aleipata Itupa i Luga, ma Anoamaa i Sasae.