O le aso 13 o Iuni 2018, o se aso o le a faagalo gata i le afioga ia Vui Masinamua Seinafolava, aua o le aso tonu lea na tuuaia ai e le afioga i le palemia o Samoa le afioga ia Tuilaepa Sailele Malielegaoi le afioga ia Vui Masinamua Seinafolava, o ia tonu lea o le OLP, peitai, e le ioe iai le malo tele o Ausetalia i ia tuuaiga, ina ua faalauiloa e Ausetalia o le afioga ia Vui Masinamua, o se tamalii ua afu lana tautua mo tagata lautele i totonu o Ausetalia, ma ia tatau ona amanaia lea tautua e ala i se Faailoga Faapitoa.
O le aso 13 lava o Iuni, na faapine ai lea mau a le malo o Ausetalia e ala lea i le Faailoga Faapitoa na tauaaoina atu i le afioga ia Vui Masinamua Seinafolava, le Federal Award for Outstanding Volunteer Work to the Community.
O le itula e 10 i le taeao o le aso 13 o Iuni na faataunuuina ai le sauniga faapitoa i le Mecure Hotel Liverpool City, e tauaaoina atu ai le Faailoga Faapitoa i le afioga ia Vui, e le sui faipule o le itumalo o Werriwa, ia Anne Stanley na fai ma sui o le Malo o Ausetalia.
O le afioga ia Vui Masinamua Seinafolava, o le Pule Faavae (Founder) o le 2FS-Radio, o ia foi o le Failautusi o le Fono Faufautua a Samoa i Sini. O se tamalii foi ua iloga foi lana tautua i faasalalauga e le gata o leitio ae o nusipepa.
O le afioga ia Vui o ia foi o le Sui o le Samoa Times i totonu o Sini. Ua lausilafia lenei tamalii i lana tautua le faatuaoia i le atunuu, ua loa foi tausaga o ai filofilo i upufai o Malo i Samoa, a’o tulai mai le afioga i le Tui Atua Tupua Tamasese i le tofi ta’ita’i o le SNDP.
E manatua foi e le toatele le afioga ia Vui i lana tautua i luga o le Radio Polynesia, e ala i lana faasoa, lea foi sa lalaga ai le tele o mataupu ogaoga sa faalafi i polokiki a Samoa. O uiga masani lea o le afioga ia Vui, e le gugu i se mataupu na te silafia e le amiotonu ma aafia ai tagata lautele o Samoa.
O le tautua faaauau a le afioga ia Vui e ala i le leitio o le 2FS Radio, Le Foafoa o Samoa, o loo faaleo ai lona finagalo tuusa’o e le gata i le mataupu tau i le Resitalaina o eleele faaleaganuu, faapea nisi o mataupu ogaoga i Upufai o Samoa. Atonu o le mafuaaga lea o le tuuaia e le Palemia o Samoa e faapea o ia o le OLP. E ui lava i nei tuuaiga, e talitonu le afioga ia Vui e le noatia ai lagona faaalia, e le avea foi ma mafuaaga e solomuli ai le tautua o loo ia faia mo tagata Samoa uma o loo alaala ma aumau i Ausetalia aemaise le aai tele o Sini.
O se tasi o ia tautua e pei ona pine faamau i le tulaga manuia sa iai le Samoa Day na galulue iai le afioga ia Vui faapea le Fono Faufautua a Samoa i NSW, e pei ona molimauina le silia i le 20 afe tagata na molimauina lea faamoemoe sa faalauiloa ai Samoa e le gata i tu ma aganuu ae o siva ma taumafa Samoa.
Na saunoa le afioga ia Vui e faailoa lona agaga faafetai i le Malo o Ausetalia, ona o le amanaia o si ana tautua faalea’ua’u, e le o se tulaga e mitamita ai, ae lagona ai le agaga maualalo, ma faafetaia ai le Atua, aua o ia e faafoi iai le viiga, i soo se galuega ma soo se tautua tatou te faia.
