Tauaao faailoga taualoa mo le tamaitai lauiloa o Samoa

O se tasi o tamaitai ma o se tina talavou o le atunuu ua silafia e le toatele i lona lotolotoi ai i faaagatama i le tai i tuuga fautasi lea ua na o ia lava le tamaitai kapeneti, le afioga ia Vaimasenuu Zita Sefo Tago-Martel, ua faaeaina i se tasi o faaaloalo maualuga a le Pelesetene o le Malo o Farani.
O le Aso Tofi, aso 30 o Me na tauaao ai e le Amepasa o le Malo o Farani mo Samoa, le faailoga taualoa a le pelesetene o lea Malo i lea tamaitai o le atunuu, ona o lona sao ma galuega lelei mo le malo o Farani.
Ua sefulufā nei tausaga o avea Vaimasenuu Zita ma Konesula poo le Honorary Consul o lea malo i Samoa, ma o se alo tamaitai e faasino i le afioga Tago Sefo Aloalo Ioane ua tuumalo, ma le tina o Vae Tago Sefo.
O lona tuaa o Tago sa avea ma pule o le Faalapotopotoga tele a le malo o le Esetete Tausi i tausaga ua mavae a o soifua.
O le faaaloalo maualuga a le Pelesetene ma le Malo o Farani mo lea alo tamaitai o le atunuu ua faaipoipo i se tagatānuu o Farani, o le amanaia foi lea o Samoa i le va nonofo ai o Malo aemaise ua lauiloa i lona avea ma uluai tamaitai ua na kapeteniina se fautasi.
E tele siamupini ua umia e le fautasi o le Segavao talu ona tulai mai le Afioga Vaimasenuu ma kapeteni e lē gata i tuuga fautasi o le Teuila ma le Tutoatasi, a o faagatama i le tai i Amerika Samoa.
O le fale mataaga o le Tusitala lauiloa o Ropati Lui Sitivinisone i Vailima na faia ai le sauniga e tauaao aloaia ai le faailoga taualoa.