Tauaao e Leuluaialii Olinda ona moliaga

O Oketopa o le tausaga ua mavae na aliali mai ai se feteenaiga i le va o le tamaitai loia Samoa e faamautu i Niu Sila, le afioga Leuluaialii Olinda Woodrooffe, ma se tamaitai ofisa o le Matagaluega o Faamasinoga i Samoa. O le feteenaiga lea na mafua ai ona faaulu se tagi a le Matagaluega o Faamasinoga i leoleo faasaga i le tamaitai loia, ma afua ai moliaga e lua o le faia o upu taufaifai ua molia ai Leuluaialii Olinda. O sailiga a le tusitala i le fia iloa poo fea ua fai i ai lenei mataupu, na faaalia ai e se ofisa sinia o le Matagaluega o Faamasinoga ua faatulaga o le aso 9 o Iuni 2009, o le a valaauina ai le mataupu i le faamasinoga faaitumalo.
O le vaiaso na tea nei na faatoa mafai ona tuuina atu ai e leoleo le tusi samania o le tamaitai loia, a o feagai o ia ma se mataupu tau faamasinoga i le faamasinoga maualuga. Sa maua ai le avanoa o le tusitala e fesiligia ai le tamaitai loia e tusa ai o le mataupu. Na faaalia e Leuluaialii Olinda, ua maea ona tusi mai lana loia o se Queen Counsel (QC) i le Komesina o Leoleo i nisi o mataupu o loo fia maua i ai se silafia, peitai o le faaaliga a Leuluaialii e lei maua atu lava se tali, ae o lea ua momoli atu lona tusi samania.
Na faaalia e se tamaitai ofisa o le faamasinoga sa iai se feteenaiga na tulai mai i le va o se alii leoleo na alu atu ma le tusi samania ma le tamaitai loia, ona sa teena e Leuluaialii Olinda le tusi samania ona e le talafeagai le nofoaga ua faaoo atu i ai. O se alii leoleo satini o le vaega o faamasinoga a leoleo le prosecution na mulimuli oo ane ma tuulima loa le tusi samania i le tamaitai loia. Sa faamaonia mai e le loia lona taulimaina o lea tusi, peitai sa le maua sona taimi e talanoa atili mai ai i le tusitala ona sa pisi i lana faamasinoga.
E faalua ona valaau moliaga o Leuluaialii i le faamasinoga faaitumalo peitai na toe tolopo ona o le talosaga a le itu a leoleo e lei maua le ua molia e tauaao i ai lona tusi valaau poo le tusi samania. O le taimi nei o loo le mafai e le tamaitai loia ona toe talanoa tele mai i lona faamasinoga ona ua i aao nei o lana loia. O le mataupu lenei na talosagaina ai e Leuluaialii Olinda se fesoasoani a le ofisa o le Hai Komesina o Niu Sila i Apia i le tausaga ua mavae, ina ua taumafai atu ni alii leoleo e saili mo le ave iai o lona tusi samania. Sa tuuaia ai e le tamaitai loia le faatinoga o tiute o leoleo i le le tausisia o auala faaletulafono e faatino ai a latou galuega. O le taimi nei o loo tālia se faaiuga o suesuega a le sosaiete o loia i Samoa agai i ni faasea se lua faasaga i le tamaitai loia, o se suesuega e ese mai i moliaga ua tuuina atu i le faamasinoga.