Ua atoa le tausaga talu foi ona faataunuuina taaloga masani ale Pulega ale ekalesia Faapotopotoga ale Atua Samoa A.O.G (Samoan Assemby of God) i Kuiniselani, a’o iai i faiga malologa ma faamanatuina ai le tāua ole Eseta poo le Aso Maliu ole Faaola ile 2018. Ole Aso Faraile ile aso malolo, sa feagai lava ekalesia ma a latou sauniga masani e toe faapupula atili ai i tagata lotu le faaosoosoina o Iesu ma le ta’imuaga o lona maliu e pei ona silafia. Ole Aso Toonai, 31 o Mati, na tatala ai taaloga tuufaatasi ale pulega, lea na a talimalo ai le pulega ale itu i Matu (Northside).
Ole Aso Sa ole toetu sa faapea foi ona feagai lava ekalesia ta’itasi ma sauniga, e masani ai, e pei ona faafofoga foi i Tina sa mua’i talai atu le tala ua toetu Iesu, a’o le Easter Monday, ole toe aso lea nai Moamoa na taualuga ai le taamilosaga ole kirikiti Faa Samoa moni, e pei ona vaevae iai le pulega i itumalo e tolu, North Brisbane, Central Brisbane ma Logan City.
Ole susuga ile faafeagaiga ia Eteuati Filipo, o ia lea ole peresetene o taaloga ale pulega a Kuiniselani, faatasi ai ma sui ta’itoatolu mai i itumalo e tolu, o latou ia ole komiti sa nafa pe faafoeina taaloga. Ose weekend sa tulimatai mai iai le aiga lotu taitasi ma le Pulega e feiloai ai foi, e le gata e taumamafa faatasi, taaalo faatasi, talatalanoa faatasi ma fiafia faatasi ai aua o avanoa e seasea ona maua ona ole pisi ole ola ua iai nei vaitaimi.
Sa saunoa le afioga ia Leafinealii Terry Fauea, na vaaia le faamanuiaina ole fanau ale Atua i lea weekend, e le gata i tagata lolotu ole pulega a Kuiniselani, o tauaiga ma uo sa auai atu e maimoa, ae faapea foi le lagolagosua ale aufaigaluega ale Atua, tainane le faamalumaluga ale susuga ile toeaina ole pulega a Ausetalia, o ia foi ole ta’ita’i ole pulega a Kuiniselani, le susuga i Ps Manuula Nai ma le faletua ia Foloi.
Na taaalo tausaafia uma ‘au i loto ma agaga peitai ole aotelega, na toe sola foi le itumalo o Logan City ma le siamupini ole 2018, e pei ona i ai le tuufaatasiga o taalaoga, i aso malolo ole Easter Weekend i lenei tausaga.
Ole ‘au foi lea, le itumalo a Logan City sa manumalo ile tausaga ua mavae. Ole agaga fiafia e pei ona faaalia mai, ole maua lea e tagata uma ole fiafia i mafutaga faa le ekalesia e toe faatupulaia ai pea le fia galue ma le soifua auauna ile Atua i totonu ole ekalesia.
