E toa sefuluono pagota sa faauuina i le polokalame sa faatinoina i totonu o le falepuipui i Spring Hill i Waikato e ta‘ua o le Malaga Polynesia.
O le autū o lenei polokalame o le “Polynesian Journey in Samoa”. i se isi faaupuga, o le malaga a le Polenisia i totonu o Samoa.
O lenei polokalame o loo fesoasoani malosi i le toe faatepa lea o pagota i o latou tupuaga ma o latou faasinomaga, ia poo tu foi ma aganuu e pei ona soifua ma ola mai ai, e lē gata i totonu o Tonga, Fiti, Samoa, Niue, Rarotonga ma isi lava Atumotu Polenisia, e pei ona faaalia ai e le afioga Leau Asenati Lole-Taylor, o ia lea sa nafa ma le faafoeina o lenei polokalame, faatasi ai ma le lagolagosua a le susuga i le faafeagaiga ia Paulo Ieli.
O le sefulutolu o pagota sa faamanuiaina i lenei polokalame o loo faapea ona tuli a latou faasalaga i totonu o le vaega ua ta‘ua o le “Pacific Focus Unit” i Spring Hill. O lenei Unit poo le Iunite foi sa fausia faapitoa lava ina ia faaaogāina ai le tomai faaleaganuu e toefuataina ai pagota o ē o loo faamaonia o latou soligatulafono i le itu tau faamisa, poo le ita faamoemoeina.
O le tāua tele o le faaaogāina o tu ma aganuu e faatalanoaina ai nei polokalame, e faigofie ai ona iloa e le pagota ona fetuunai lona mafaufau i auala e fesoasoani ai ia i latou ina ia aua ne‘i toe faaluaina a latou soligatulafono e pei ona falepuipui ai.
Sa faaalia e le afioga Leau Asenati Lole-Taylor, ua faamaonia e tusa ai ma nisi o sailiiliga, o le faatalanoaina o pagota i auala e faaaogāina ai tu ma aganuu, e mautinoa lava le galueaina ma ua iai foi faamaumauga o le tāua ma le aogā o lenei auala auā le toefuataina o pagota.
E fa ni vaega sa aofia ai i lenei polokalame – o le faasinomaga, aiga, agavaa, ma le va fealoai ma isi tagata. O vaega ia sa toe faapupula atu i pagota lona tāua i le soifua ma le ola o le tagata.
E ao ina malamalama i lona faasinomaga ma faatāuaina.
E ao foi ona faatāuaina lona aiga, aemaise ai o le faaaogā tatau o agavaa e fausia ai ni atina‘e lelei e tua i ai le agavaa, ae o le auga o nei mea uma, o le iloa lea o le vafealoai, auā o le ute lea o le soifuaga o le tagata Polenisia, o le va ma isi tagata.
Na faaalia foi e le Afioga Leau Asenati le agaga faagaeetia ona o le lagolagosua faaauau a le afioga i le Hai-Komesina o Samoa i Niu Sila, le Afioga Asi Tuiataga Faafili Blackelock ma lona faletua ia Letelesa Helen Blackelock e pei foi ona faailoa e ala lea i le faatasi ane i le faamoemoe.
Na faaalia foi le agaga faagaeetia o le afioga ia Asi e tusa ai ma galuega o loo faatinoina i totonu o lenei polokalame, o se faiga aogā ma le tāua tele mo pagota, e saga tapenaina ai i latou mo le toe foi atu i aiga pe a mae‘a a latou faasalaga, ma le faamoemoe o le a lē toe faaluaina soligatulafono e pei ona faafalepuipuiina ai.
