Sa molimauina e nisi o mātua o tupulaga talavou o Manurewa, le tele o le sao ma le aogā o polokalame faifai pea a se tasi o alo o le atunuu le susuga ia Vili ma lana fale taalo. O ia polokalame e faagasolo ma e faifai pea i tausga uma, ma kuata uma o malologa ma tuuaga a le fanau mai aoga.
O le molimau a nisi o mātua ma tupulaga talavou, o ia fuafuaga a Vili ma le vaega, ona o le mafai ai lea ona taofia mai tamaiti mai le soona tafafao solo, ma avaga gofie ai o latou mafaufau i tuinanauga leaga, ma manaoga faatiapolo e faaosoosoina ai. O le tele o faalavelave ma solitulafono ua oo lava foi ina maliliu ai nisi ona e mafua mai i tupulaga talavou.
O tafaoga a tupulaga faapotopoto solo, ma sosoo ai lea ma le taupulepule e faia faiga matagā ma le tauvalea mulimuli ane ai oo i le tulafono ma falepuipui ai lava. O vaega mautinoa lava ia, o loo tutupu pea, ma e lē misi i vaiaso ma soo se vaitaimi o le tausaga. Ua toatele fanau ma tupulaga ua afaina ai o latou ola, ona o le leai o ni polokalame e faatumu ai o latou taimi, ma taofi mai ai i le soona fefiloi ma isi e faatupuina faiga leaga ma solitulafono.
O le vaiaso talu ai na faato‘ā faamae‘a ai foi fuafuaga ma le polokalame sa auai le toatele o talavou i Manurewa, i le malolo mai ai tuuaga, ae sauni atu mo le toe foi i aoga. O se tasi o vaaiga matagofie tele sa tapenaina ma faatautaia e le susuga ia Vili ma lana pulega e aofia ai le a‘oa‘oina i le tulaga o le puipuia e le tama ma le teine o ia lava mai ni aafiaga o misa ma osofaiga faasaga ia i latou (self defence).
O se vaega e faapitoa i le a‘oa‘oina o gaioiga ma tapenaga i le taimi o osofaiga, sa auai ane ma fesoasoani i le aso mulimuli o le polokalame. Sa vaaia le fiafia ma le gauai i ai o le fanau talavou, auā e moni o se tasi lea o faatosina lelei mo i latou, i le a‘oa‘oina lelei e tali atu, ma tetee atu i le fili ma tagata faatupu faalavelave i le taimi e osofaia ai.
O osofaiga e faaaogā ai agaese, o fana ma nisi o auupega malolosi ma le maamaai, sa agai tonu i ai a‘oa‘oga ma faatinoga sa faia e le vaega faapitoa mo so latou sao e fesoasoani ai i talavou o Manurewa.
Saunoa le susuga ia Vili, o le a toe vaavaai foi i nisi mataupu fou e agai i ai le faamoemoe pe a toe agai mai le isi malologa ma tuuaga a le fanau o loo sosoo mai i lenei tausaga.
Sa faamaonia foi e le susuga ia Vili, e moni ua maitauina ma vaaia pea le aogā ma le agai i luma o mafaufauga o le toatele o i latou sa auai ma fiafia pea e faaaogā ia avanoa e pei ona ofoina i ai, e leai se totogi, ae maua ai foi ma le taumafa auā le tausiga o le tino.
O le vaai mamao ma le autū o loo tulituliloa pea e Vili ma le pulega, o le taumafai malosi lava ina ia tau taofiofi mai tupulaga, mai aafiaga ma faiga faakegi, ma taaga a tupulaga masani, e iu ane ai i le faaoolima, misa, faomea, gaoi, talepe fale ma isi vaega leaga ma le matagā o le soifuaga nei.
