E lelei tele le aapa mai o lima agalelei o nisi e laveai ma fesoasoani i ni mafatiaga ua aafia ai tagata pe a faaleagaina meatotino e pei o faatoaga ma fale i ni mala faalenatura e pei o afā, lologa, ma mafui‘e.
Peitai a tuu i se isi itu e lē lelei pe a tatou ola faalagolago foi e aunoa ma lo tatou toe liliu e faatino le tatou pitolaau o le toe atinae aiga ma faaleleia mea ua faaleagaina.
O le naunautaiga lea o le Malo i le faagasolo ai o ana galuega e toe faaleleia mea ua faaleaga e le afā o Eveni, e pei ona aumai le tuualalo a le taitai o le Malo, le alii Palemia i le atunuu aemaise i latou ua afaina meatotino, ina ia toe agai e faaleleia fale ma faatoaga, ma tapena le gasu o sauaga a le afā ma lologa na aafia ai.
O le mau lea a le toatele o loo talitonu pea i le agaga tauivi ma le olaga galue punouai o tagata Samoa.
Faaalia e le Palemia i sona finagalo i le mae‘a o le afā, ua taunuu fesoasoani mai paaga ma uo mamae a Samoa i atunuu e mamao, ae o le sini lava o galuega uma o tatou o tagata Samoa ua aafia ina ia toe galulue faatasi e faafoi le soifuaga i le mea sa iai a o lei afea e puapuaga ona o lologa ma afā.
O le Aso Toonai na tea nei aso 5 o Ianuari 2013, na tapunia uma ai nofoaga sa faamautu i ai tagata ua faaletonu fale, ma ua fautuaina e toe foi i o latou nuu ma aiga e amata ona toe faufau mea ua faaleagaina.
Ua faailoa mai ai foi e le Malo le tufatufa atu o tapoleni, ma isi vaega o fesoasoani mai fafo e pei o mea faigaluega e faatino ai tapenga o mea ua faaletonu.
O mea faigaluega ua tufatufa faatasi ai ma ipu e faaaogā e aiga ua matua leai ni ipu ona ua tafiesea o latou fale e lologa ma tafega.
O ia vaega e aofia ai ipu mafolafola, ipu ti, o solo fafano, taga aluga, ma isi vaega e pei o: 1. cleaning kits – spade, rake, machete, broom, mop, bucket, scrubbing brush 2. kitchen kit – 6 x plates, 6 x cups, 6 x spoons, 1 x shar knife, 1 x 2.75L pot, 1 x 40L plastic container 3. linen kit – 2 x tea towels, 2 bath towels, 2 x sheet material, 2 x pillowcases 4. newborn kit – 1 x pkt nappies, 1 x towel, 2 x sheet material, 1 x wet wipes, 1 x baby powder, 1 x baby oil.
O le saunoaga faamanuia a le taitai o le Malo i le alii Palemia na ia faamanatu ai i le atunuu le suiga ua iai nei le faia faatasi o le vaiaso o talosaga ma anapogi ma le vaiaso o lotu amata o le tausaga.
“Ua lalago faatasi nei a tatou foe ma atofa ai le uluai vaiaso o le tausaga, e lē gata o le Vaiaso o Talosaga o le Tausaga Fou, e pei ona faia e Ekalesia Kerisiano uma i Samoa, a ua faatāuaina ai foi Talosaga ma Anapogi,……………auā a siisii ou gataifale ma loulouā ou vaifanua, ua na o le Atua Silisili Ese le sulufaiga o Samoa mai faalavelave faanatura.
O le Atua foi e aoao Lana silafaga. Na te lē faatua‘oia foi se taimi o le faaoloolomaau, auā o taimi uma lava o la le Atua lea. E ao ai ona tatou mulumuluaufoe faatasi i lenei faamoemoe lelei”. O se vaega lea o le saunoaga a le afioga i le Palemia, Susuga Tuilaepa L Sailele Malielegaoi.