O le avea o se alii e fai ma tamā, o se tulaga tāua tele. E iai tiute ma matafaioi e tatau ona faataunuu.
O le faanoanoaga i nei vaitau, ua tele fanau ua tuulafoai e o latou tamā. E pei o le tetea ma taitoalua, poo le sosola foi pe afai ua ma‘itaga nai fanau teine.
O se faanoanoaga, e lē gata i le tina ua tuulafoaina, ae o le tagata fou lea o le a soifua mai i totonu o se siosiomaga e leai se fiafia o iai.
A lē o lea, o nisi ua faaalu taimi i galuega, poo ni pisinisi, ae ua faatuatuanai nai fanau i ni taimi mo latou. E iai taimi e ta‘u ai lē ua fai se fanau o le tamaloa, peitai, e lē o mafai ona fai e lea tamaloa ona tiute faatamā.
O le tatou tusi faitau, o loo ta‘u ma ai le tamā o Iāiro, o le alii e pule i le sunako. O lona tulaga e tāua ma e faaaloalogia i totonu o le nuu.
E na te faia tofiga o e tutū ma auauna i totonu o le sunako. A iai ni a‘oa‘o e asiasi ane, o lana matafaioi o le faasoasoa o avanoa e faitau ai tusi tulafono.
O se galuega e ave i ai le faaeaea ma le faamuamua a tagata Iutaia.
Ae ui i lona tulaga taualoa, ae sa iai sona manaoga.
O se faamanatu mo tatou, poo le ā le ituaiga tagata e iai lou tagata, e lē ‘alo faafitauli mai ia te oe. E faapena le mea ua tupu iā Iāiro.
O le afafine o lenei alii, e pele i lona loto, o le mea uliuli i lona tamatamaimata. Afai o oe o se matua faitama, e te malamalama i lagona ia ua maua ai Iāiro, o lagona o le fememeai.
E lei Mā e Saili se Fesoasoani
O ia lava lea sa alu e talosaga ia Iesu mo se fesoasoani mo si ona afafine. E lei tulia i ai se isi, poo lona toalua poo se isi o le aiga.
Ua taulamua lava ia, ina ia saili fofo mo le faafitauli ua feagai ma si ona afafine. E a‘oa‘o mai ai le tāua o tiute o le tamā. Ia faamuamua ia te ia manaoga o lona aiga, ae o le tina e fesoasoani.
Tiga ona pisi i ona tiute i le sunako, ae sa faamuamua lona afafine. Sa alu ma faapa‘ū i aao o Iesu ma lana olega, O le a oti nei lava si o‘u afafine, inā e maliu atu, ma ia e faaee ou aao i luga ia te ia e malolo ai, ona ola ai lea o ia.
E lē afaina le vaai atu o lau fanau, o e tagi mo lo latou faaolataga. E iai le tāua o lou toaga i lotu ma tapuai ma le fiafia i le Atua.
E lē gata i le Aso Sa, ae o totonu foi o le fale, ia latou iloa ai ou uiga tausaafia ma le matagofie. Auā o latou o meapueata, latou te maitauina uma a tatou aga ma uiga e fai.
E lei Mā e Aumai Iesu i Lona Fale
Atonu e te faapea mai, o le ā le tāua o lea mea? Ia manatua, o le tele o tagata Iutaia, sa latou muimui ma faapea ane, o Iesu o le uo a e agasala.
E aai o ia ma le ‘au aolafoga, o le mana foi o temoni na te faia ai vavega. E tele nisi lafoga lē tonu sa fai e le motu o tagata, ae taulamua ai le au Faresaio ma le au tausi tulafono.
O lona uiga, o le valaaulia e Iāiro o Iesu i lona fale, e tutupu ai foi ma ni manatu faaletonu o nisi. Ae lei popole i ai Iāiro, auā ua ia mautinoa, o Iesu – o le tali.
O le mea o loo manaomia e Iesu, o ni fale ma ni aiga e ogatotonu ai o ia.
E lē na o le falesa i taimi o tapuaiga masani, ae ia faaulufale foi o ia i totonu o o tatou fale, ma o tatou aiga. Ia avea o ia o se uo i taimi uma.
O le pese a le Aoga Aso Sa; a iai Iesu i se aiga, o se aiga fiafia.
O la le faisalamo, afai e lē atia‘e e Ieova le fale, e galulue fua i latou o ē atiina a‘e; afai e lē leoleo e Ieova le aai, e mataala fua o lē na te leoleoina. E tāua tele le nofotupu o Iesu i totonu o o tatou aiga.
E lei Mā i le Tulaga sa iai Lona Afafine
Ua lē popole Iāiro i le manatu o tagata ma lona tulaga taualoa i le sunako. Ae ua faamolemole ane ia Iesu. O lona alofa i lona afafine, ua le mā ai.
Ou te talitonu, e lei galo i lenei teineitiiti le mafuaaga o lona toe ola mai, ona o le alofa pulunaunau o lona tamā, sa saili ai. Afai sa matua ma fai foi sana ia fanau, e lē misi lea tautinoga e faamatala pea, le alofa o si ona tamā ia te ia.
O le tele o taimi, tatou te manatu, e faatau ni meaalofa taugata mo tamaiti, e iloa ai lo tatou alolofa tele. O lo‘u lagona, o le alofa, o le iai lea o ni taimi e mafuta ai ma talatalanoa, ma faamatala i fanau le mafuaaga o le tāua o le avea o Iesu ma faaola i totonu o aiga.
O le Atua le Tamā
O se isi mea matagofie ua ta‘u mai e le Tusi Paia, o le Atua, o lo tatou tamā. O lona alofa ma lona agalelei, ua faamanuiaina ai i tatou. Fai mai Paulo: “Auā ua outou le maua le agaga o le pologa, e toe fefefe ai; a ua outou maua le Agaga o tama fai, tou te valaau atu ai, Ava, le Tamā e.”
