“E tāua ia te au le saogalemu o tagata feoai,” Leanapapa Laki
“A sui la faitotoa o pasi i le itu agavale e tatau ona sui i ai ma le foeuli, aua ou te puipui i le saogalemu o lau fanau o loo feoai i au pasi ae tainane le atunuu femalagaai”, o se finagalo lea o Leanapapa Laki Anderson na faailoa i le tusitala ina ua fesiligia i le lumanai o lana pisinisi, aemaise o ia o se tasi o le sosaiete a le au faipasi i Upolu o loo teena le fuafuaga a le Malo e sui faitotoa o a latou taavale itu agavale.
Na faaalia e Leanapapa Laki, e tumau lona taofi e le saogalemu pasi pe a fau na o le faitotoa i le itu tauagavale ae na ona pupuni o le pu sa iai le faitotoa i le itu taumatau.
O loo talitonu lea tamalii e vaivai atoa le tino o le pasi pe a faia faapea, ae tatau ona toe fau atoa le tino o le pasi ma fau ai ma le faitotoa i le itu agavale. O le mafuaaga lea o le talosaga a le sosaiete i le Malo mo se fesoasoani tau tupe.
Ua tolu augatupulaga i le aiga o Leanapapa o le pisinisi lava o pasi laupasese o loo ola ai.
“Na amata mai i lo‘u grandfarther, sosoo ai ma lo‘u tamā lea ua oo mai ia te au o pasi lava o loo faamoemoe i ai le tausiga o le aiga ma isi fuafuaga masani.
O lea o le a tuu atu i le augatupulaga lona fa (lana fanau) ae ua ou popole ma le alofa i ai pe afai e le saogalemu o latou ola i le fuafuaga a le Malo”, o se tasi lea ona finagalo faaalia. E ui ina tele faamanuiaga ua maua e lea tamalii ma lona aiga i le pisinisi ae o lana mau e le suia, e afaina tele le saogalemu pe a faatino le manao o le Malo.
O Leanapapa Laki o se tasi sa avea ma faipule o le Palemene mo le itumalo o Faasaleleaga ma o le vaega a le HRPP na muamua lagolago i ai ina ua faatoa ulufale i upufai o le Malo. Peitai na faamavae ma avea ma faipule tutoatasi sa agaia malosi le Malo ma o ia o se tasi sa iloga foi ona faaali ona lagona tetee i nisi o fuafuaga a le Malo a o avea ma faipule.
Aafia faiga faapolokiki
O le talitonuga o le taitai o le Malo e pei ona fesiligia le afioga i le Palemia, susuga Tuilaepa L Sailele Malielegaoi i sona finagalo, ua aafia faiga faapolokiki i le faaiuga a le au faipasi.
“O le faaipoipoga lea e iai nei o le faaipoipoga tuu umi e le faapea na o se mea e faailoa ai lou televave.
E iai le upu foi lele vaai i e naunau tele i le i‘a ae manumanu i le upega ona tasi lea o lau i‘a e maua i le asō ae oo atu i le isi taimi ua leai sau i‘a.
O le faalavelave o le au faipasi o lea e taitai mai e faipule e tetee mai i le Malo, o lona uiga ua taenai uma i manatu o e sa faipule, o e ua lauiloa i lea mea o le tetee, soo se mea a e fai atu e le Malo na o le tetee, tetee, tetee”, o se saunoaga lea a le alii Palemia.
O loo iai foi le talitonuga o le Palemia, o mataupu a Samoa e fofo a alamea ma e mafai ona fetuutuunai.
O loo finau le sosaiete a le au faipasi e $50 afe tala e sui ai faitotoa o pasi laupapa, ae $80 afe mo pasi faamalu.
Peitai na saunoa le alii Palemia o le mau a le isi faipasi e na o le $700 tala lava e alu i le suiga o le faitotoa.
“E faapefea la ona finau mai latou ae o lea e ese le manatu o lea faipasi”, na faaopoopo mai ai lava Tuilaepa i se talanoaga ma le tusitala o lenei nusipepa.
E lei faailoaina e le alii Palemia poo ai le faipasi lea na la talanoa.
Ae o se tasi o ana Minisita le afioga Toleafoa Apulu Faafisi, e iai lana pisinisi o pasi laupasese ua maea ona sui faitotoa i le itu agavale.
O le Aso Gafua, 7 o Setema 2009 na amata ai ona tutu uma pasi a le sosaiete i Savaii ma Upolu.
