E fa aso o vaaia pea I luga o auala o Aukilani I Saute le anoano o tagata o loo laeiina mitiafu lanu mumu ma le faaupuga o le tusia ai SERVE Team.
O lenei au e fauina mai I ekalesia kerisiano eseese na galulue faatasi e faailoa le alofa o le Atua I le lalolagi I galuega alofa e fesoasoani ai mo I latou o loo moomia se fesoasaoni.
O le tausaga lona tolu lenei ua faatinoina ai lea faamoemoe.
O le tofa na ae ma se naunautaiga a le susuga I le faafeagaiga ia Lui Ponifasio ma le ekalesia o le LifeChurch I Manurewa ina ia aua nei nofoai le Ekalesia ae tatau ona tatou galulue e faailoa le alofa o le Atua e ala le mea e mafaia ona tatou faia e pei o galuega lelei ma galuega alofa.
E lata I le 500 I latou na auai I le Servolution I lenei tausaga.
E toatele nisi o le mamalu o le atunuu sa valaau mai i le ofisa o le Samoa Times i le vaiaso talu ai, ma fesiligia ai pe mata e oo atu le fesoasoani sa faagaioia e le vaega a le Servolution, i aso e 4 o le vaiaso na tea nei.
O le galuega mo le faamamaina o laufanua, atoa ai ma foliga o le siosiomaga o Aukilani i Saute, aemaise ai foi sa ofoina lea lava fesoasoani mo aiga sa manaomia se fesoasoani mo ni galuega faatino.
O le faamoemoe o le SERVOLUTION, o le taumafai lea e faamama lapisi, ma titinaina tusitusiga i luga o pa ma puipui o fale e oo lava foi i meatotino a tagata taitoatasi, aiga ma le malo.
E le gata i lea, ae sa ofoina foi lea lava fesoasoani mo soo se aiga sa manaomia se fesoasoani mo ni galuega e fia fai ae leai nisi e faatinoina.
O nei auaunaga uma e faia e aunoa ma se totogi.
E ui e le o se taimi muamua lenei ua faia ai lea tulaga, peitai e iai lava se feau taua na mafua ai ona a‘e se tofa i le aufaigaluega a le Atua sa tuufaatasia lenei faamoemoe, o loo momoli atu ai.
E iai le talitonuga o le faia ma le ofoina o lenei galuega tele, o se faataitaiga lelei lea mo tupulaga fai a‘e, aemaise o i latou o loo fiafia pea e valivali ma tusitusi faamatagā le siosiomaga o le aai.
Ae mo tagata matutua, e ao ina toe timata le upega ma toe sasaa le fafao, ina ia mautinoa e taua tele le galulue faatasi.
Masalo e le mafai ona e ofoina lou taimi e faapipii ane ai ma avea o se tasi o le au galulue a le Servolution, peitai o lou taumafai e taofi ma tuu ia te oe lau lava lapisi, aua le togia ma faasalalauina i nofoaga faitele, ua lava lea e fai ma ou sao, ma o lau fesoasoani lea mo le galuega fita ua ofoina i ai le tautua a nisi uso a tagata, e pei o le vaega sa feagai ma le galuega.
O le vaavaai tele, ma silasila i le faaleagaina o meatotino a isi, ma taumafai i auala e taofia mai ai tupulaga mai amioga matagā ma le lē taupulea, o le isi foi le auala o le galulue faatasi e foia ai le faafitauli, mulimuli ane o lou fesoasoani lava foi lea e faaauau le feau o loo tau momoli atu e le Servolution.
E tele ma anoanoai auala e mafai ona avea ai i tatou ma sui o le Servolution, tusa lava pe ua le mafai ona avanoa sou taimi e auai ane ai, ae mafai lava ona tatou tofu sao mo le galuega fai faatasi.
Sa talanoa le tatou nusipepa i nisi o faifeau, o loo iai i totonu o le polokalame, ma o i latou foi sa auai sui o a latou ekalesia i le galuega mo le toe faaleleia o le aai i Aukilani i Saute.
Pastor Afa Pulotu (Ekalesia a le Au-Uso Kerisiano i Magele)
E taua tele ma ou ioeina gofie le autu ma le faamoemoe o lenei taumafaiga. Manatua foi e tatau lava ona silafia ma iloa e tagata uma, e taua tele i le Atua ana mea na fai (God cares for his creation).
O le tulaga foi lea e ao ia i tatou, o le ata vaaia o mea na fuafua ma fai e le Atua, ona puipui ma faamatagofie i o tatou tino, ma lo tatou siosiomaga, aua o mea uma lava na faia i aao o le Atua.
O le finagalo foi o le Alii, e le na o le laugaina o le tala lelei i loto o tagata, ae taua tele foi le faatinoina e auala i galuega fai. O le tasi lea o auala e tiliva ai le feau o le tala lelei, o galuega. O le galulue faatasi o le lauga, ma galuega faatino ua fesoasoani tele i le soifua auauna o tagata.
O se fiafiaga tele i la‘u aulotu le faatunuuina, ma le ofoina o taimi mo lenei galuega, aua o le auauna lava lea i tagata lautele, ma faailoa atu ai le finagalo alofa o lo tatou Alii.
O le a mafai foi ona fesootai ai ma isi uso Kerisiano, e tupu ai le fiafia ma le agaga o le galulue faatasi, ma manatua ai pea le soifua alofa i le Atua ma ana fuafuaga i le lalolagi.
E oo lava foi i le fufuluina o le taavale e manatu māmā i ai nisi ma lē faataunuuina, ae o vaega uma lava ia e i totonu o le faaleleia o mea na fai e lo tatou Atua.
O le ekalesia a le susuga ia Afa Pulotu e pei ona faaalia lona finagalo, sa galulue faatasi ma le susuga ia Peter Leota ma le ekalesia a le Peace Chapel, faapea ai ma le susuga ia Poni Fonoti ma le Harbour Praise i Magele lava.
O galuega sa faapitoa i ai le auaunaga, o le pikiina o le lapisi, fesoasoani i aiga mo ni galuega fai, ae faaiu i le fufuluina o taavale ma le BBQ.
Pastor Paul Gibson (Livingwater Otara Baptist Church)
O le tausaga muamua lenei ua ofi ai Otara i le polokalame, ma ua faia foi i ai ma le galuega a le Servolution. O au sa ou iai lava i le tausaga talu ai, peitai e lei faia se galuega mo Otara, ae o le tausaga la lenei ua ou fiafia ua taulia si ou pitonuu mo galuega fai.
E lagona lava le fiafia, faafetai foi i nisi o uso a auauna ona o le tuu mai o le tauau ma lagolago mai i lenei faamoemoe.
Ou te faafetai foi i le uso auauna ia Lui Ponifasio, ma isi auauna sa latou amataina lenei galuega lelei ma le taua. Aua o le mea moni lava, e foliga foi lea na o le Aso Sa lava, ma le alu i le lotu, ae le o iai se fesootaiga ma isi, aemaise lava o tagata lautele o le nuu o loo nofo ai, ma fafo atu.
O le isi tulaga taua ia te au, ua maua ai sa matou mafutaga vavalalata ma le toatele o isi uso galulue poo auauna a le Atua. O se mafutaga soofaatasi ma ua mafana foi.
O se tasi o uso auauna i Otara nei, o le susuga ia Brian Paki, o le Maori, ae ua tuu mai foi lona tauau, ma fia galulue faatasi ma lenei faamoemoe, ona o le taua tele.
Ua iai se manatu, masalo ua umi tele pe a faatali mo le tausaga ma faatino le galuega, ae ua iai se manatu o Otara, pe tai kuata ma fai, tolu masina ma faataunuu. Ia ae sei matou talanoa ma komiti ma le aufaigaluega a le Atua, mo le faatinoina o ia manaoga.
O le susuga ia Paul Gibson, o le faifeau o le ekalesia Livingwater Otara Baptist ua 15 tausaga o loo galulue ai. Peitai i le auai i le galuega soofaatasi a le Servolution, sa galulue faatasi ai ma le susuga ia Brian Paki, o se faifeau Maori, mai le ekalesia Christ for all Nation, faapea le susuga ia Michael Loto ma le ekalesia Grace City Church i Otara lava.
Sa faapitoa la latou tautua i aoga mo le faamamaina o lapisi ma tapena le lotoa a o lei amataina aoga a tamaiti i taeao.
O isi galuega e pei o le moaina o le vao, toe valiina o pa a nisi o aiga o tamā ma tina matutua, o aiga o tina nofo toatasi, a o nisi sa galulue malosi i le taulaga faatau i Otara mo le teuteuina lelei o atigivae ma atigi lima o tagata lautele i le nofoaga.
O nisi ekalesia sa galulue i Manurewa ma Manukau, e pei o le susuga ia Pastor Alapati Atoa o le ekalesia Full Gospel Pentecostal Church, ma le susuga ia Lui Ponifasio ma le ekalesia LifeChurch, Jim Shaw ma le Manukau New Life. Sa faapea foi ona auai nisi o sui mai isi ekalesia e iai le Perepereane, o le Elim, faapea ma le ia Esera Maeataanoa ma le Every Nation church.
O le pikiina foi o le lapisi, tapeina o tusitusiga ma valivaliga, toe vali pa a aiga ma nofoaga faitele atoa ai ma le tele o isi galuega, sa ofoina mo tagata lautele o ia aai, o galuega uma ia, sa nafa ma ekalesia e pei ona taua i luga ma ona sui galulue.
E lata I le 500 taga lapisi na aoina, lata I le 300 taavale na fufuluina I aso e tolu, sili atu I le.
O le Aso Toonai sa faauma ma mae‘a ai galuega a le Servolution mai vaega eseese ma aai e pei ona sa galulue ai.
O le molimau a le toatele o i latou sa auai mai le Aso Lulu e oo mai i le Aso Toonai o le vaiaso na tea nei, sa latou taua ai le tele o tagata i nuu uma sa galulue ai, o loo manaomia tele ni fesoasoani.
A o se tala mai ia i latou sa faatinoina le galuega, sa lagona ai le faafetai ina ua mae‘a ma le loto fiafia ma le saoloto, ona ua fai se aoga mo tagata lautele, ae o le tauaogaina foi lea mo le galuega a le Atua, e ala i ekalesia o loo galulue punouai ma tautua ai.
O le tausaga fou o le faapea ai ona see atu le Servolution I le pitonuu o West Aukland
