Avea ia lenei tusitusiga e momoli atu ai la‘u faafetai ma le faamalo i afioga Epikopo o le Ekalesia Katoliko Roma o Aukilani faapea le Ekalesia o Egelagi i Aukilani lava.
Faafetai mo la outou agaga fia fesoasoani. O lea ua faailo mo le silafia o Niu Sila atoa ma ona tagata. Faafetai i lo outou alolofa faamaoni i la outou lafu mamoe. Ua outou lē manatu lava i se isi itu, ua outou lē lalafi e pei o le toatele.
Ua outou punonou lava ma saili vave loa se auala ona o le tagi atu o tagata faigaluega mo se fesoasoani. Faafetai i lo outou loto toa, auā o taimi faapenei e manaomia ai toa e tulai auā le puipuiga o tagata vaivai, tagata ua puapuagatia.
Mo le silafia e le tatou Atunuu, o le Aso Faraile o le vaiaso ua tea na faalauiloa ai le talosaga a le Afioga i le Epikopo (Bishop) Patrick Dunn o le Ekalesia Katoliko Roma i Aukilani ma Afioga i Epikopo (Bishops) Ross Bay ma Kito Pikaahu o le Ekalesia Egelagi i Aukilani, le latou ofo fia fesoasoani i le vevesi ua tulai mai nei i le va o le pulega o le kamupani o loo pulea galuega i luga o le uafu i Aukilani (Ports of Auckland Limited), ma le aufaigaluega ma le latou iuni o le Maritime Union of New Zealand.
O le taofi i Afioga i alii Epikopo o nei Ekalesia o se mea tatau le taumafai o le pulega o le kamupani ma taitai o le iuni a tagata faigaluega e faaauau pea a latou talanoaga auā le sailiga o le fofo i lenei vevesi.
Ua saunoa Afioga i alii Epikopo e tāua uma le kamupani ma le aufaigaluega, e lē sili le isi i lo le isi. E tāua le kamupani ona o le pisinisi lenei o loo maua mai ai galuega ma tupe maua e totogi ai galuega. E tāua foi le aufaigaluega auā o latou nei o loo faatinoina galuega, ma o latou nei o loo faaaogāina o latou totogi e faasafua i le tele o atina‘e mo le lelei o o latou aiga, faapea foi atina‘e o loo manuia ai tagata lautele i totonu o Aukilani lava ia.
Ona oo lea i le Aso Toonai, ina ua mae‘a mai fiafiaga o le Pasefika Festival, matou savavali faatasi ma le aufaigaluega ma latou iuni i le solo tetee sa fai i Aukilani.
Ou te lei vaai o iai nisi o taitai o Ekalesia Samoa i lenei solo, se‘i vaganā ai tagata o le aufaigaluega ua faatea e le kamupani o le uafu.
Sa auai foi nisi o tatou tagata o loo aafia i le tasi afe (1000) o tagata faigaluega ua faatea e le kamupani fale fasimanu o le Affco. Sa faapea foi ona iai nisi o tatou tagata o loo galulue i le kamupani o le Oceania Groups, lea o loo iai le konekarate o le tausiga o tagata matutua ma tagata o loo maua i ma‘i o le tino.
E tāua tele ia te au le auai o o tatou tagata i nei solo tetee. O se tasi lenei o auala e mafai ai ona tatou tutu faatasi ma faailoa atu ia i latou o loo pulea nei kamupani ma fale faigaluega e lē talafeagai a latou faiga o loo faia i le aufaigaluega.
E tāua nei solo ona e tāua tele galuega mo le tausiga o aiga. Afai e leai ni galuega, pe lē lelei foi le totogi e maua mai galuega, e faapena ona faigofie ona oo mai faigata ia te oe ma le tausiga o lou aiga.
O le masani foi o nei vevesi, afai e talia gugu lava e le aufaigaluega faiga a pulega o kamupani, e manatu faamaualuga ai lava nei kamupani tetele, e pule saoloto lava latou.
A o nei aso o le malamalama ma aso o tulaga faatemokarasi, e tāua kamupani, e tāua foi le aufaigaluega, ma e iai aiā tatau a tagata faigaluega e tatau ona faatauina e pulega o nei kamupani.
O le fesili, afai e talia e le aufaigaluega le manao o le kamupani ia faakonekarate itula faigaluega, ma aua ne‘i toe iai ni galuega tumau e pei ona masani ai, ona fesili lea faapefea la le tausiga o aiga o tagata faigaluega?
Afai na o galuega lē tumau, toe puupuu itula faigaluega, toe maualalo totogi maua, e faafefea nei ona maua e tagata faigaluega le fesoasoani e mafai ai ona tausi o latou aiga?
Afai foi ua faaletonu galuega ma latou totogi, a o lenei foi ua leai se fesoasoani mai le Malo, o fea e sulu i ai tagata faigaluega mo le tausiga o latou aiga?
Afai ua leai se galuega, ma ua maualalo tele le totogi o galuega o loo faigaluega ai o tatou tagata, faapefea ona lelei le tausiga o tatou aiga?
Faapefea foi ona lelei le faatinoina o tiute faaleaiga Samoa, pe afai ua leai se galuega, leaga ma totogi o galuega o loo galulue ai?
Faapefea ona faatino o tatou tiute faale-Ekalesia pe afai o loo faaletonu galuega a latou o loo tutu malosi i galuega a le Ekalesia?
O la‘u maitau i suiga ua amata ona aafia ai nisi o tatou aiga, afai e leai loa se galuega, ua sola loa manatu lelei. Ua leai se fiafia i mea faitele a aiga potopoto. Ua ‘alo‘alo foi ma mea faale-Ekalesia.
E leai, leai foi sa‘u faitioga i ai pe afai o tulaga ia ua amata ona oo i ai nisi o tatou aiga auā o lenei lava atunuu o le tagata lava ma si ana galuega. Afai ua leai se galuega i Niu Sila, ua leai se lumanai o oe ma lou aiga.
Afai ua faaletonu tupe maua a aiga, ua faaletonu foi sao i meafai a aiga ma Ekalesia. O le mea lea ou te manatu ai e tāua tele le sao a taitai o le Ekalesia Katoliko Roma ma le Ekalesia Egelagi i le sailiga o se fofo mo le vevesi o loo feagai ma uafu i Aukilani.
