O le fetufaaiga i finagalo faaalia ma le tele o fesili o loo faanenefu pea i tagata Samoa agai i auaunaga lautele i matagaluega a le malo ma isi, sa faaautu i ai se polokalame o a‘oa‘oga sa faagasolo i nuu ma aai o Aukilani i Saute.
Sa maoae le tulaga na oo i ai taumafaiga a alo ma tamafanau a Samoa o loo faauluulu i galuega a le malo, ma nisi o auaunaga tuma‘oti, i le faatinoina o le latou pitolaau e ala i le faalauteleina o faamatalaga, ma mataupu taitasi e tatau ona manino i ai.
E telē se tāua ma sona aogā mo tagata uma o ia a‘oa‘oga ma lona autū. Ona talu ai, e fai o le lē manino o tagata lautele, ae faapea foi ona lē mafai ona faaleoina manaoga ma finagalo.
I le pitolaau a tagata faigaluega o loo latou faamaonia le tulai mai o le faafitauli, ma ua saili fofo ai e ala i le faaaogāina o polokalame o a‘oa‘oga e pei ona faagasolo ai.
O Matagaluega e pei o Lafoga (Inland Revenue), Tupe Maua ma Atina‘e, (WINZ), o Fale o le Malo, (Housing New Zealand), o le Eletise (Mighty River Ltd), o Leoleo, ma Taaloga Faitupe ma Petipetiga, sa tofu ma sao e ala i sui sa auai mo le faamalamalamaina o mataupu eseese i le va o Matagaluega ma a latou auaunaga, faapea tagata lautele.
Sa faaaogāina ma faamalamalamaina mataupu uma mai sui taitasi sa auai, ae faapea foi fesili a le mamalu o tagata lautele, i le gagana Peretania ma le gagana Samoa.
O se faamanuiaga e lē au maua, ona o le mafai ona tatala mai o le avanoa mo soo se tasi e fesiligia ai soo se mataupu e fia mautinoa ma fia malamalamala ai, aemaise foi o taimi sa faaavanoa mai e le au faigaluega.
O le tamaitai Samoa o Helen Amituanai mai le kamupani eletise a le Mighty River, sa tu malosi tele mo le tuufaatasia o lea faamoemoe.
O ia foi lea sa fai ma sui o lea kamupani, e tiliva ma faamanino vaega uma e ao ina silafia, aemaise lava o le masini faapitoa a le GLOBUG, ua maitauina le toatele o i latou e faaaogāina ona o le faasaoina o le eletise i maota ma laoa.
O le GLOBUG, ua toatele nisi o le mamalu o le atunuu ua latou faaaogāina ma ua molimauina foi le tulaga lelei ma le faasaoina ai o le eletise.
Saunoa Helen o le tāua foi lea o le polokalame sa fuafuaina, ina ia mausali pea fesootaiga ma tagata lautele o loo latou faaaogāina lea auaunaga, aemaise ai ia faaleoina pea ane o latou finagalo, pe afai o iai ni fesili e fia malamalama ai.
O le isi Matagluega sa sili ona tele le afaina ai o tagata lautele, o le ofisa o Lafoga ma le malo (IRD).
O Helen Lisiua sa fai ma sui o lea foi Matagaluega e faia se faamatalaga ma faamalamalamaina uma vaega o galuega ma tiute fai.
E aofia ai le tele o tupe ma seleni faamatuu ane pe a agavaa i ai, atoa ai ma lona toe totogiina pe a sese ona faaaogāina.
E lavelave ma gaosa tele foi feuiaiga ma le faagasologa o galuega i totonu o lea Matagaluega, ma na maitauina foi, le tele o isi auaunaga e lē o mafai ona maua i ai se manino ma se silafia o tagata lautele ma Samoa.
Sa maitauina le tele o fesili sa faaleoina e le mamalu sa auai, ma o se faailoga mautinoa lea o le lē malamalama, ma le nenefu pea o le tele o faiga, tu ma aga a le IRD.
E tāua tele le silafia ma le iloa lelei, ona o nisi lava vaega o galuega, faato‘ā manino ane lava, ae ua tuai ma ua faigata ona faia se faiga, ma e ono molia ai lava i le tulafono.
O le Matagaluega a le WINZ, sa auai mai ai le tamaitai o Winniefred Danielson ma le alii o Sione Hopoate e fai ma o latou sui, e fesoasoani i le mataupu ma tali fesili a tagata lautele.
O le isi foi o Matagluega a le malo e maoae ma matautia le mau gaogaosa ma feuiaiga e mafai ai ona talia talosaga, ae o le faalauiloaina o alagatupe ma fesoasoani tau taumafa e agavaa i ai soo se tasi.
O le isi o auaunaga sa auai foi ma fai lona sao i lea lava faamoemoe, o le Gambling Problem, poo faafitauli o taaloga tau petipetiga, ma taaloga faitupe.
O le faletua ia Rufo Pupualii, o ia lea sa saunoa ma momoli le feau faalototele, ma le feau faamalosi mo i latou ua aafia tele ma ua tuinanau i taaloga faitupe.
E lē gata i lea, ae sa ia faamanino foi ni faiga fou, ma auala e mafai ai ona fesoasoani e tau tuumāmāina ai le soona avaga ma le mafatia tele o finagalo pe a oo ina aafia tele i manaoga leaga o le tino, ma le faaaogāina o seleni e mafua ai le mativa, misa ma le lē vaaia lelei o fanau, ma matua tausi.
O le susuga ia Akerei Malesala ma lona soatau mai le ofisa o leoleo i Clendon, sa auai ane foi ma fesoasoani i auala e puipuia ai mataupu tau solitulafono e aafia ai.
E lē gata i lea, ae sa lapataia foi tagata lautele ina ia fesootai ane pea, ma valaau ane i le ofisa, aua ne‘i fefe pe solomuli e faailoa le manaoga o loo manaomia.
Sa ia ta‘ua o Manurewa ma Aukilani i Saute, ua amata mea i se tasi o poloketi fou a le Matagluega o leoleo faato‘ā amata ma faagasolo.
O lea polokalame fou, o le tatalaina lea ma tuuavanoa leoleo e feiloai ma fefaasoaai ma tuaoi ma tagata lautele, ina ia soalaupule ai ni mataupu ogaoga e ono tulai mai i totonu o aai ma nuu ma taulaga faatau.
O le tasi o itu sa faamalosia i le saunoaga a le alii leoleo Samoa, sa ia valaauina ai soo se tasi lava e maua le avanoa, ina ia auai ane i talanoaga o loo faia i totonu o le nofoaga poo le hall a Matariki i Clendon.
O po Aso Lulu o vaiaso taitasi o loo faia ai lea feiloaiga ma alii mamalu o le malo, ma talanoa ma tagata lautele.
E manatu le ofisa ma le Matagaluega o Leoleo, o le tele o taimi e faaalu e talanoa ai ma feiloai ma tagata lautele, o le faaitiitia lea o faiga solitulafono, ma faafitauli e tulai mai.
Ia avea leoleo ma paaga ma uo a tagata lautele, ae lē o le na o le loka ma ave faamalosi o tagata, ua atili fefefe ai ma lē tautala sa‘o ai i pogai o faafitauli.
O loo iai le fuafuaga a le tamaitai sa taitai ma tuufaatasia lea polokalame, Helen Amituanai, o le a faaauau pea ona faia ia a‘oa‘oga tāua, ona e aogā tele mo tagata lautele, aemaise lava o tagata Samoa ma le Pasefika.
