“O la‘u siaki mulimuli na aumai e na o le tolu selau ma ona tupu”…Kale Lealiifano
O le tausaga e 2008 na tatala ai e le Palemia le pisinisi ao aitalafu o le Debt Free i Samoa sa faafoe e ni tamaitai Samoa se toalua (taofia o la suafa).
O le fale o le Nia Mall faafesagai ma le itu i Sasa‘e o le maketi i Fugalei sa iai lona ofisa. O lana auaunaga o le aoina mai lea o aitalafu, ma sa sulufai i ai nisi sa nofo aitalafu ai isi tagata mo se fesoasoani mo le toe faaolaina atu o a latou seleni.
O le toatele lava o le au faipisinisi faleoloa laiti ua fiu e tulituli tagata ua lē toe totogia oloa na latou aitalafu.
O le tina o Kale Lealiifano o Vaovai le tasi o tina faipisinisi na sulufai i le Debt Free. “Sa tapa mai e totogi atu le latou auaunaga, ma sa ou totogia ona o lo‘u manao e toe faaola mai uma tupe o oloa sa aitalafu e tagata i lo‘u faleoloa”.
O le faamatalaga lea a le tina o Kale ma lana tala e to‘a sefulutolu le au nofo aitalafu i lona faleoloa na ia aveina i le Debt Free mo se fesoasoani.
“Fai mai e maua e latou le 20 tala mai tai selau tala uma e toe totogi atu e tagata ma faaopoopo i ai le latou 20 pasene i luga o aitalafu taitasi”.
O le faamatalaina lea e le tina o aiaiga ma tuutuuga o le pisinisi a o aitalafu.
Fai mai le faamatalaga a Kale e tusa ma le $26,000 le aofaiga atoa o aitalafu na ia ave i le pisinisi mo se fesoasoani.
O faamaumauga ia mai le tausaga e 2008 na sulufai ai mo se laveai, peitai o lana sikai muamua na maua atu e $1,700. Sosoo ai ma nisi siaki tupe o le latou aofaiga atoa e silia i le tolu afe.
“O le mea lena na ou toe alu ai saili le ofisa ae ou maua faamatalaga ua leva e lē o toe faia”. Ua iai ni molimau e faapea ua toe foi i Niu Sila le tamaitai sa ia umia le pisinisi e faapea se faamatalaga a se molimau faatuatuaina sa galue muamua i se kamupani a le Malo, a o lei faia lana pisinisi ao aitalafu.
O se isi foi tamaitai sa la galulue faatasi ua toe alu ese ma Samoa ma ua iai le talitonuga ua toe nofo nei i Aotearoa.
O le popolega o le tina o Kale e lē gata ina leiloa poo iai pea ni ana aitalafu ua maua ma alu i le teugatupe a le Debt Free i se faletupe i Samoa, ae ua lē mafai nei ona maua tamaitai mo le toe faafoi atu o ana seleni.
O le tasi itu faigata o se tamaitai fomai sa ia toe totogi lana aitalafu i le pisinisi i le alu sa‘o o se vaega tupe o lona totogi i le teugatupe a le pisinisi e faapea ua leva ona tatau ona mae‘a, ae o loo alu lava lana selau tala i le Bank o loo iai le teugatupe a le Debt Free.
O le faalapotopotoga o le Toomaga mo Ē Puapuagatia ua ave i ai le mafatiaga o le tina o Kale Lealiifano pe faamata e maua ai le ‘au ao aitalafu mo se faamatalaga poo iai pea ni ana seleni pe ua goto i se tofē.
