O le a faatalitali nei le pulega o le Faalapotopotoga o le Koluse Mumu a Samoa pe toe ano mai faalapotopotoga i fafo sa auala mai ai ni alagatupe e fesoasoani e totogi ai nisi o lana aufaigaluega sinia ua faamalolo ma vaea ese ona ua motusia lea fesoasoani.
E toafā le aufaigaluega sinia ua faamalolo i le vaiaso ua mavae e aofia ai ma le alii o le vaega o auaunaga faalesoifua maloloina a le Koluse Mumu a le atunuu, le susuga Apineru lea sa faauluulu i ai le Faalapotopotoga o le Soifua Maloloina mo Aiga, le Family Health Service mo ni tausaga.
I se talanoaga ma le failautusi o le Koluse Mumu a Samoa le faletua o Namulau‘ulu Tautala Mauala na ia faaalia ai, o le motusia o seleni sa aumai i ni fesoasoani i fafo e totogi ai i latou ua faamalolo, e lē o se taimi muamua ua tupu ai. Peitai o se faamatalaga a se tasi o sui sinia o le faalapotopotoga e lē o manao e faailoa lona suafa o loo ia faaalia ai e le teitei tutupu mai ia tulaga. O lana faamatalaga e tatau ona iai se mafuaaga o le taofia o le aumai o le fesoasoani.
O loo iai pea tala salatua o loo faaalia ai ni faaletonu o loo aafia ai le faaaogāina o meatotino ma seleni a le Koluse Mumu a Samoa.
E lē o ma‘oti mai ia tala salatua poo ā tonu faaletonu nei, ae o se molimau na ia ta‘ua o faaletonu nei e mafua i le lē faaaogāina tatau o seleni i mea e tatau ona alu i ai, aemaise lava nisi o fesoasoani na aumai mo le sunami ae sa lē lelei ona faasoasoa e le Koluse Mumu mo tagata na aafia.
O se komiti sa tofia e suesueina tuua‘iga faasaga i le Pelesetene sa iai muamua o le faalapotopotoga lea na feteenai ma se vaega o sui o le komiti faafoe, e oo mai i le taimi nei e lē o iloa poo fea ua fai i ai le taunuuga o galuega a lea komiti sa taitaifono ai se alii loia. O tuuaiga foi na taunuu i se tagi a lē sa avea ma pelesetene faasaga ia i latou na faia tuua‘iga.
O le faamalolo ai la o le au faigaluega e toafā na faaalia e le failautusi aoao o loo faatalitali pea pe toe tatala mai le fesoasoani tau tupe mai fafo mo totogi o i latou ua vaea. O lana faamatalaga foi e faapea atonu e toe faaauau a latou galuega.
Ua faaalia e se sui o le Komiti faafoe sa logoina i latou i le tulaga ua aliali mai ma na faateia ai lona sui. Peitai ua ia ta‘ua o le a faatoa iloa lelei le mafuaaga o le motusia o lea fesoasoani mo totogi pe a oo atu se lipoti a le pulega o le Koluse Mumu.
