Ua lua po soosoo o taumafai lava le atunuu e feoai solo ona o le masalosalo i se nofoaga e ono tetele ai le palolo o lenei tausaga.
E fai o le toatele ua uta i vaa agai i Savaii ae o le toatele ua uta meafaigaluega mo le galuega tele ua fuafua mo le taina o le i‘a ae agai i le atu Aleipata aemaise vaega o Safata.
O timuga tetele o le vaiaso ua mae‘a atu na atili ai le taumafai o tagata e fai faanoi i galuega i le talafatai o Apia ae agai i itu o le atunuu o loo tele ina maua ai le palolo i tausaga taitasi auā le taumafai ai e saili se palolo.
O le vaveao o le Aso Faraile na agai ai le toatele i gataifale ma faatalitali ai ma o le molimau a nisi na tumutumu i Tuialamu, faasolo mai ai i Mutiatele ma sau ai agai i Lalomanu, e matuā vaivai lava palolo na maua ma e ta‘i ‘afa itula le va o le maua o ni palolo taitasi faato‘ā maua le isi.
O le faamatalaga a le Ofisa o le Faigafaiva, o le palolo e ta i le atoa ai o aso e fitu mai i le atoa ai o le susulu a le masina.
O le vaveao la o le Aso Faraile na tau ai le toatele o le a tatau ona ta ai le palolo ae na faaalia e le Ofisa o le Faigafaiva o le taeao o le Aso Toonai.
Na o Tiavea ma Samusu ia na maua ai nai paelo taitasi sa mafai ona faatau i le aualatele i le taeao o le Aso Faraile, ae e leiloa pe na taulia auā o le moto le lapoa o le ofu ae i le va o le $40-$50 tala le tau.
O le Aso Toonai na asia ai le maketi e leai foi se palolo. O le mau a le Ofisa o le faigafaiva, e faigata tele ona toe vaaia le tetele o le i‘a i lenei vaitaimi ona o le afaina o ogasami aemaise amu i le tausaga na tea nei i mafui‘e tetele ma sosoo mai ai lava ma le sunami.
O le i‘a e tele lava i nofoaga o loo tele ai le amu soifua maloloina lelei ma e tele lava se vaega o le gataifale o Samoa na afaina.
Sa iai le manatu e tatau ona tele le palolo e maua i le motu tele i Salafai ae o le tali lava foi lea e tasi mai i le Maketi o Salelologa i le tau leai o se palolo na maua.
O le mau a nisi, ona pau lava ua lē a‘e le i‘a auā sa tele foi tausaga ua tuanai sa lelei lava amu ae e lei tele lava se palolo na maua i ogasami sa matauina ai lea tulaga.
O le valoaga a le Ofisa o le Faigafaiva, o Lefaga e tatau ona lelei ai le palolo maua ae na matauina e lei faamanuiaina le toatele na agai i lea itu o le atunuu.
Atonu o le tausaga fou o le a feoloolo se i‘a maua ae mo i latou o loo iai le manaoga e talia ni palolo mai Samoa i lenei tausaga, ai seiloga e $500 tala e agai ma oe i nofoaga o loo ta‘u mai ai le maua o le palolo, ona faato‘ā lava lea o se oso.
