Ua faailoa nei le tau faapoloaiga lona tolu mo le kuata faaiu o lenei tausaga, e pei ona molimauina i tau ua faatulaga mai o oloa manaomia o aso uma i le itu i oloa tau taumafa, ma oloa mo totonu o le lotoifale o aiga le palasi o le tau o nisi oloa, ae o nisi oloa ua siitia. O loo tumau pea le tau o isi oloa e pei o le ava malosi ma le sikaleti.
O le oloa tau taumafa o le araisa o le tau maualalo i le pauna i Upolu e $1.20 sene mo le ituaiga o le araisa o le Pearl Rice, ae $1.30 sene i le pauna i Savaii. E sefulu ituaiga o araisa o loo faatulaga mai i le tau fou o oloa o latou tau ma o araisa uma ia o loo aumai mai fafo.
O le tau pito maualuga lava o lenei oloa tau taumafa e faatau ai i le pauna i le atunuu atoa e $1.70 sene i Upolu ae $1.80 sene i Savaii, o lona uiga e lē o tatau ona toe maua se araisa faatau pauna i tau sa iai muamua i le taimi sa taugata ai lenei oloa, ina ua tau faaitiitia sa oo i le $2 tala ma sene i le pauna.
O ituaiga o sefulu o araisa o loo aofia i le tau fou lenei o oloa o le Island Sun, FRC, Thai White, Pacific Rice, Pearl Rice, Vietnamese Round, Golden Islands, o le araisa o le Crown, ma le araisa o le ituaiga o le Golden State.
O le falaoamata e ono ituaiga ma o le tau maualalo i le pauna, e $1.20 sene ma le $1.30 sene i le pauna i Upolu ma Savaii, ae o le tau pito maualuga o le $1.30 ma le $1.40 sene i le pauna i motu autū e lua o le atunuu.
O le taumafa o le eleni poo le pilitati e 16 ituaiga o loo maua i le atunuu e aofia ai apa eleni suauu ma le apa i‘a sositamato.
O le eleni pito maualalo le tau o le Ocean Queen suauu e $1.70 sene i Upolu ae $1.90 sene i Savaii.
O le eleni pito taugata lona tau o le Taiyo suauu e $8.50sene i Upolu ae $9.90 sene i Savaii. Faaalia e le failautusi o le komiti o le tau faapoloaiga o oloa, le faletua o Unasa Tauaiupolu Iulia Petelo, o le tau o eleni ma taumafa tuuaisa ua iai nisi apa pilitati ua pa‘ū tau ae sii laititi isi ma e faapena foi i taumafa tuuaisa.
O loo tumau le tau o oloa e pei o le avamalosi ma le sikaleti, ae o le fautuaga mai le failautusi i le atunuu, ia logo atu le ofisa pe a iai ni aiaiga o le tau faapoloaiga fou ua faalauiloa e lē o usitaia e le aufaioloa.
O nisi o oloa o loo aofia i le tau faapoloaiga na amata faamamalu i le amataga o le vaiaso nei o apa pisupo o ituaiga eseese o loo maua i faleoloa, saimini i o latou ituaiga eseese, susu suavaia ma susu pauta, tulinamu, taumafa tuuaisa e pei o tauau pipi, tapuvae puaa, ua mamoe, lapalapa mamoe e pei ona faaigoa ai e le toatele poo mutton flaps, ma vae moa.
O loo aofia ai foi ma le faatulagaga o tau o le kesi ogaumu faimeaai a le kamupani o le Origin Energy lea e $9.30 sene i le pauna le tau o lana kesi ogaumu i Upolu ae $9.80 mo Savaii.
O le kamupani o le BOC i Vaitele e $9.20 sene i le pauna o lana kesi ogaumu mo Upolu ae $9.70 sene i Savaii.
