Ta‘u e le tamaitai leoleo faamalolo mea matagā o loo fai i totonu o Tafaigata

O se tamaitai leoleo ua faamalolo pe ua tuli i se faaiuga a le Komesina o leoleo ma falepuipui mai lana auaunaga sa galue ai i totonu o le falepuipui i Tafaigata, ua ia tuuina atu sana tusi i le Palemia susuga Tuilaepa Lupesoliai Sailele Malielegaoi, ua faailoa ai nisi o mea faaletonu e aofia ai ni faiga matagā e aafia ai pagota tamaitai i totonu o le falepuipui i Tafaigata, faapea ni amioga faapoulipouli a le leoleo pule o se tasi o komesina lagolago ma ni tamaitai pagota.
O le tusi o loo saini ai le suafa o lea tamaitai e lē o toe avea ma leoleo o le falepuipui na ia faia ma tuuina atu i le Palemia ina ua faia le faaiuga e faamalolo. O loo faailoa e Adeline i lana tusi na te lē iloa poo le ā sana mea ua faaletonu i le faatinoina o lana galuega. I le amataga o lana tusi i le Palemia o loo ia faapea mai ai:
“Lau afioga ua ou tuuina atu lenei mataupu mo sou finagalo malamalama ona o lo‘u matuā tetee lava i le faaiuga ua faamutaina ai lau auaunaga mai le Matagaluega o leoleo ma falepuipui i le aso 20 o Me 2013, ona o tuua‘iga nei o loo ou tetee ai, e atagia mai ai le lē sa‘o ona fai”.
O se polokalame e ta‘ua o le Fortress of Faith e faatino e se tina sa galue faaleoleo le afioga Tavui Annie ma se isi tina o loo tuua‘ia e le tamaitai e ana le tusi e faapea ua avea ma pogai o le faia e nisi o pagota o nisi o uiga lē lelei.
“O le poloklame foi lea o loo taitaia e Annie Laumea ma Ruta o le (Skippy rest) ua mafua ai le tele o faafitauli ua alia‘e i le va lea o pagota tamaitai ma pagota alii, ua fai ma mea ua maua ai le avanoa e faia ai ni mafutaga faasolitulafono, i taimi e faia ai ia a‘oa‘oga ma faitatala ai ma nei mafine i mea o loo tutupu i le nuu”.
O le alii pule foi o le falepuipui ua tuua‘ia i lona faia o ni amioga ua faapouliuli ai ma nisi o teine leoleo ma tamaitai pagota.
“Ua maitauina ma molimauina e le aufaigaluega le moe o lenei tamaitai (taofia le suafa) i le ofisa o le (suafa alii pule o le falepuipui) i taimi faigaluega ma taimi e lē faigaluega ae e aunoa ma se mea o faia i ai.
E oo mai i le asō o loo molimauina uma e le aufaigaluega le lē iloa poo fea ua fai i ai le mataupu a lenei tamaitai ma le pepe na eliina mai ona auivi e pei ona isi se mataupu sa faasaga ia te ia”. Ua ta‘ua foi i le tusi lava lenei ni faiga faasotoma e aafia ai ni tamaitai pagota.
“Ua leva ona silafia e le taitai nei tamaitai pagota (taofia suafa) e aafia ai foi ma se tamaitai leoleo i nei uiga matagā ae e lē o faia lava i ai se faaiuga e pei ona ripoti ia (suafa o le pule o le falepuipui) seia oo i le taimi na magalo nei pagota e igoa (taofia suafa) e lei foia lava lenei faafitauli, ma o loo faaauau ai pea e le tamaitai leoleo ia (taofia le suafa) ma le pagota o (taofia le suafa) seia oo mai i le taimi nei”.
E lua itulau o le tusi ma o loo faailoa ai foi nisi o tuua‘iga faasaga i nisi o leoleo sinia i le faia o ni faaiuga le talafeagai ua soli ai tulafono. Sa fesiligia le Komesina e tusa ai ma le tusi lenei, ma ia faailoa mai ai o loo faia suesuega pe faamaonia.
O loo iai foi masalosaloga o le alii komesina o le tamaitai e ana le tusi o ia lea na faia le tusi muamua lea e leai se isi na saini ai, ae o lea na faia loa le faaiuga e faamalolo ua toe aliae mai tuua‘iga nei ma ua saini ai lona suafa. Sa faaalia mai foi e le komesina e ui i lea masaloga ae e lē o mafai ona faamaonia.
Ua faailoa mai e se molimau faatuatuaina o le tusi e lei sainia ai se suafa lea o loo iai ma tuua‘iga lava lenei, sa tusia e se isi tamaitai sa faigaluega foi i le falepuipui o se leoleo ae ua fai si leva e lē o faigaluega ua faamalolo foi.