(Section 195 Crimes Act – E oo i le 10 tausaga e falepuipui ai pe a lē faia o tatou tiute i le vaaiga o tagata matutua, ma afaina ai se tagata matua…)
Sa ou tusia i le vaiaso na tea nei i le tatou itulau lenei le tiute o i tatou uma lava i le tulafono, i tagata matuatua (ma tamaiti laiti), aemaise lava pe a ave o tatou mātua i le falemai.
O le vaiaso nei o le a faaauau atu lea mataupu ona e tāua tele.
Na mafua le laga o le mataupu lea i tagata matutua ma tatou tiute i le tulafono, ona sa ou tusi faaseā (complain) i se fale e nonofo ai tagata matutua (Resthome) ona ua aumai i le falema‘i se tina matua i le Ambulance, ua tigaina tele, ae leai se ato e aumai ai ni lavalava, leai se tioata, leai se tusi e ta‘u ai i le falema‘i ni fualaau o inuina e lenei tina i aso taitasi ia malamalama ai le falema‘i, ma aua le ave seseina ni fualaau i lenei tina matua.
Ina ua ou vaai i le puapuagatia o lea tina, sa ou vili i le pule aoao o le Resthome nofo ai lenei tina matua ma ou ta‘u i ai le sese o le mea ua fai i lea tina. Sa uma ona ou tusi loa lea iai, e faaali i ai le solitulafono o le mea ua fai e lea Resthome i le tina matua.
Sa ou telefoni atu ae sau le poto o le fafine palagi e ona le Resthome. Sa ou tusi loa i ai, auā a lē faasa‘oina, e toe tupu foi.
Ua Aogā le Taimi na Faaseā ai i lea Resthome – atonu o le Puipui Ola o Tagata Matutua e Nonofo ai.
O le Tusi Lenei na Tali mai i la‘u Tusi
20 Setema 2012
“Dear Olinda Woodroffe,
I lau faaseā i le faatamala o matou i le lē aveina o mea e tatau ona ave (necessities) i le Ambulance: E moni oe i le matou tiute i le vaaiga o le tagata matua lea na e tusi mai ai.
Matou te taumafai i taimi uma e fai o matou tiute. Matou te faatoese atu ona ua ave le tina matua lea na e tusi mai ai i le falema‘i ae leai ma se mea na aveina i le Ambulance mo ia, sa tatau ona matou tapenaina ma ave mea ia na e ta‘ua.
O le masani lava o teine tausi ma‘i o le teu o le ato a le tagata matua ma‘i lea e ave i le falema‘i e le Ambulance, ma tuu uma i ai i totonu lavalava ma mea ia na e tusia mai i lau tusi.
E moni foi oe ona e tatau lava ona tuu i totonu o le ato pe ave i le avetaavale o le Ambulance se lisi o fualaau o inuina e lea tina e tuu e le avetaavale i le falema‘i.
E tatau foi ona tuu i totonu o se teutusi ni fualaau o faaauau pea ona faaaogā e lenei tina, ona tuu lea i totonu o le ato.
Ua tele le aogā o lau tusi mai o lenei ua toe review (vaai loloto) le matou policy ma fai fesuiaiga e tatau ona fai, ma faatonu teine fomai ma tagata faigaluega uma ia nofouta i ai, ia aua ne‘i toe tupu mai se mea e pei ona tupu i le tagata matua lea na e tusi mai ai.
E faafetai atu i lou tusi mai ma ta‘u mai le mea na tupu, ona o lenei ua matou faaaogāina e le gata mo le tina na e tusi mai ai, ae ua toe fesuiai ai a matou policies ma faatonu tagata faigaluega ina ia aua ne‘i toe tupu mai se mea faaapea i le lumanai.
Faafetai tele lava.
Manager.”
O le tusi e tusi mai faaperetainia ae sa ou faaliliuina mo le tatou pepa. E tele lesona e tatou te maua mai i lenei mea na tupu.
E tutusa lava lea ma tiute o tatou pe a aumai se isi matua ma‘i i le fale, ia tautuana mea ia e ta‘ua i luga, ina ia saogalemu o tatou mātua.
Tulafono e Puipui ai Tagata Matutua ma Tamaiti, i mea ia e ta‘ua i luga – O le Section 195 Crimes Act:
Ill treatment or neglect of child or vulnerable adult
Everyone is liable to imprisonment for a term not exceeding 10 years, who being a person who intentionally engages in conduct that, or omits to discharge or perform any legal duty the omission of which, is likely to cause suffering, injury adverse effects to health,… if the conduct engaged in, or the omission to perform the legal duty, is a major departure from the standard of care to be expected of a reasonable person…”
E oo i le 10 tausaga e falepuipui ai se tagata e mauaina ua latou soliina tiute i le vaaiga o tagata matutua poo tamaiti foi. E lē o se mataupu e faatamala i ai se isi o tatou. E sili le puipuia i lo le togafitia.
