O le manatu lea na laga i le fono a le Tautua Samoa i lenei vaiaso. O le mafuaaga ona o le fuafuaga a Amau e tatala lana maketi a o lei mae‘a le tausaga. E le gata i lea o le faaaogāina o nofoaga tumaoti i le taimi lenei mo le au faatau meamata ma isi oloa o le maketi.
Faaalia e le Tautua Samoa atonu o se auala lelei lea e tagai i ai le Malo o le ave sa‘o loa o pulega o maketi i faipisinisi latou te faatautaia. Ta‘ua e le Taitai o le Itu Agai, Afioga Palusalue Faapō II o le faaauau ona lē faaaogāina atoatoa o le Maketi i Vaitele ona o loo iai lava nofoaga nei o loo ua faamautu ai le aufaifaatoaga.
“Ae e iai le malosiaga i le Maloi latou te taofi ai le faaaogā o nei nofoaga ae agai sa‘o tagata faatau meamata ma le au faipoloka i nofoaga ua faamatuu mai e le Malo, ia ae o loo fesoasoani foi le suiga lea ua vaaia i nai tamalii faipisinisi,” o sana saunoaga lea.
O le maouta o Maketi i Vaitele ma le maketi fou i Salelologa ua vaaia ai le toatele ua agai ese mai i nofoaga nei ma na ta‘ua e le Itu Agai, o le isi lea fuafuaga a le Malo ua tutusa lava ma le fuafuaga e tuu i lalo le maketi i Fugalei ae e lei mautu se nofoaga e agai i ai le aufaifaatoaga mo le faaauau ai o le faatauga o fua o faaeleeleaga.
“O lea ua faalauiloa e le Susuga Komisi Amau le tatala o lana maketi i le faaiuga o le tausaga, e faamalō atu ai foi i lea tamalii ma e mautinoa e tatala le maketi a Amau e lei amata lava le galuega o le maketi i Fugalei,” o se faaaliga lea a le Taitai o le Itu Agai.
“Atonu o se isi lea fuafuaga e mafai ona tagai i ai le Malo o le ave loa o maketi e pulea e pisinisi tumaoti”.
O le isi nofoaga lea ua vaaia nei le agai i ai o tagata e faatau ai a latou meamata, o le nofoaga faasao lea a le Malo e i Vaitele, e i lalo mai lava o le Maketi fou i lea nofoaga.
O le faamatalaga a nisi o loo faatau ai i lea nofoaga, ua aumai le faatagaga i le Faalapotopotoga o Fanua ma Eleele o le atunuu e faatino ai a latou faatauga i lea nofoaga.
Ta‘ua e le tasi o faifaatoaga o fualaau faisua, o Poe Vitolio mai Aleisa, sa faatau ana kapisi ma tamato i le Maketi i Vaitele ae o le tele o aso e na o le $12 i le $70 tala le tupe e maua mai ma e tele ina pala ana kapisi ma tamato ma maimau ona o le leai o ni tagata faatau. E totogi foi le $10 i le poloka i le aso.
“A maua se $70 e alu le $10 i le poloka ona alu lea ma le $30 i le taavale lea e momoli mai ai a‘u kapisi ma tamato totoe ai na o le $30, o le taimi lenei ua faatoluina la‘u tupe maua ae e lē toe totogia foi sa‘u poloka ma e sau lava i le pasi tu i le alatele la‘u mai la‘u uta i le nofoaga lenei,” o sana faamatalaga lea ina ua fesiligia.
Faaalia e lenei faifaatoaga o le toatele lava e faigofie le faatau i nofoaga tu auala ma o le maualuga o a la faatauga ma lona toalua talu ona see ese ma le maketi i Vaitele, na oo ai lava i le $2,000 i le vaiaso o le Eseta.
O le isi tina sa agai mai lava i Fugalei mo ana faatauga e sau mai i Afega ae o luga i le mauga i Fasāitū e iai lana faatoaga.
Ua taofi le pasi ae faatū lana poloka i le faasao lenei a le Malo ona o lea ua lata atu ma e lē tau agai mamao mai i Fugalei ona e lei mautu se nofoaga e agai i ai talu ona tala i lalo le maketi.
