‘E leai se nofomau e maua fua’… John Key
Ua fautuaina malosi e le Palemia o Samoa, Susuga Tuilaepa Lupesoliai Sailele Malielegaoi tagata Samoa ua ova aso ua nonofo ai i Niu Sila poo overstayers ina ia foi filemu i le atunuu, aua o loo latou silafia lelei ua latou soli aiaiga ma tuutuuga o tulafono tau femalagaiga a Niu Sila. “E tatau ona foi lelei mai i le atunuu e faaaoga tatau le taimi nai lo le nofonofo ai pea i o”… na saunoa ai le alii palemia.
Na fesiligia e le tusitala o lenei nusipepa le alii Palemia o Niu Sila, John Key a o iai i Samoa i lana asiasiga e tasi le aso, pe faamata e ofo atu e lana faigamalo se avanoa e maua ai le nofomau mo tagata ua ova aso na gaugau a latou tai $500 i se alii Maori talu ai nei i ni faiga taufaavalea ma taufaasese. Fai mai le alii palemia e leai se fuafuaga faapea, ona o loo mautu le feagaiga faauo a Samoa ma Niu Sila, le Treaty of Friendship ua mafai ai ona avatu tagata e 1,100 i tausaga taitasi e nofomau i lona atunuu i le polokalame o le Immigration Quota Scheme.
“Ua le gafatia i se isi tulaga le toe faia o se faamagaloga poo se amnesty e maua fua ai le nofomau i Niu Sila o tagata ua ova aso”… na saunoa ai le palemia o Niu Sila. O talanoaga ma le Palemia o Samoa na afea ai le feagaiga faauo ma le numera e 1,100 o tagata Samoa o loo maua le nofomau i tausaga taitasi, ma na taua e Key e iai avanoa e mafai ai ona silasila i lea fuainumera, peitai na augata e tali sao i le fesili pe faamata e toe siitia lea numera i se isi fuainumera maualuga atu. O nisi o mataupu sa taua e le alii palemia, o le sauni o lona Malo e ave se fesoasoani o fualaau o le Tamiflu mo Samoa aua tapenaga a le Matagaluega o le Soifua Maloloina a lo tatou atunuu i le faamai o le fulu puaa, le swine flu.
O lea fesoasoani na faailoa e le alii palemia o Niu Sila o John Key, a o iai i Samoa i le Aso Lua ua mavae, 7 Iulai 2009 mo sana asiasiga e tasi le aso. Faaalia e le alii palemia o fesoasoani mo ia fualaau taugata e avanoa ai foi isi atunuu o le Pasefika. E lei faatamala le vaega o le soifua maloloina i lo tatou atunuu i le siakiina o le alii palemia ma lana aumalaga pe le o aafia i ni auga o le swine flu ina ua taunuu i le malae vaalele i Faleolo. I se feiloaiga ma tusitala na faailoa ai foi e le alii palemia o John Key le siitia o fesoasoani a lona atunuu mo Samoa, lea o le a amata i le tausaga faaletupe lenei i le $14 miliona tupe Niu Sila, e faatusatusa i le 10 ma le afa miliona sa iai i le tausaga faaletupe ua maea.
O le tausaga fou e $15 miliona, sosoo ai ma le tausaga faaletupe 2011 i le 2012 o le a maua ai e Samoa ni fesoasoani e tusa lona tau aofai ma le $17 miliona tala Niu Sila. A o iai le asiasiga a lea taitai i Samoa sa ia sainia ai se maliega ma le alii Palemia, Susuga Tuilaepa Lupesoliai Sailele Malielegaoi, ua faamautu ai lea fuafuaga atoa ai ma se maliega o le a mafai ona avanoa ai fitafita o le puipuiga a lea Malo e auai i ni faataitaiga tau i le puipuiga poo le defense e faia i Samoa i soo se taimi. O le faitau selau o tagata Samoa sa gaugau a latou seleni talu ai nei i se gaioiga taufaasese a se alii Maori, na faaalia e le Palemia o Niu Sila e leai se fuafuaga a lana faigamalo e tuuina atu se avanoa faameaalofa e maua ai ni nofomau o le toatele o tagata Samoa ma isi atunuu ua ova aso i Niu Sila. Ua na o le misi alofa o le alii palemia o Key i le toatele na alu le tai $500 Niu Sila i lea alii Maori ona o le fia maua o se nofomau i Niu Sila, peitai o se faiga taufaavalea ma taufaasese. O le Aso Lulu na toe tuua ai Samoa e le Palemia o Niu Sila ma lana aumalaga.
