O le faailoa e le faipule o Siumu o se sui o le faafaletui o le vaega e puipuia aiā tataua a tagata le HRPP (Human Rights Protection Party) le iai o se fuafuaga a ia ma nisi faipule o le latou itu e faatū se isi pati fou, ua lapataia ai e le Sui palemia le sui faipule o le minisita lagolago o le Matagaluega o Aoga, Taaloga ma Aganuu e faaeteete i le faia o ana saunoaga. O le finagalo lea o le Sui palemia le tofa Fonotoe Nuafesili Pierre Lauofo i se fono ma tusitala i le faaiuga o le vaiaso ua mavae, ina ua tele lipoti a leitio ma televise faapea nusipepa i le faatū ai o se isi pati fou e taitaia e le faipule o Siumu. O le faailoa ai o lea tulaga ua manatu ai le faipule o Faleata i Sisifo le tofa Lealailepule Rimoni Aiafi, ua ao loa ona faia se palota laitiiti a Siumu e toe sailia ai se isi ona tofi faipule ona o lea ua aliali le finagalo o Tu‘uu Anasii i faasalalauga.
E talitonu Lealailepule o aiaiga o le tulafono o faiga palota e pei ona sa teuteu ai le faavae faapea tulafono tumau o le Palemene faasino i se tulaga faapea ua ao ai ona faatino loa lea tulaga. O Lealailepule ma Palusalue o faipule sa aafia i se faaiuga a le Fofoga Fetalai o le paeaiga ua mavae a le Palemene ina ua mananao e faatū se latou pati faaupufai lea na uluai faaigoa o le Tautua Samoa. Na faia ai le faaiuga a le Fofoga Fetalai i lea vaitaimi le tofa Tolofuaivalelei Falemoe Leiataua e soloia o la nofoa ae foi e faatino palota laiti. Peitai sa finau atu nei faipule i lea paeaiga faapalemene e afaina ai o la aiā tatau e faia ai le la filifiliga saoloto aemaise o le aiā tatau o tagata palota a o la itumalo. Peitai sa faia lava faaiuga ma toe foi e faatino palota laiti lea na toe filifilia ai Palusalue Faapo e lona itumalo o Safata ae malolo le tofa Lealailepule. O le faigapalota tele o le tausaga e 2011 na toe pale atu ai Lealailepule i le tofi o lona itumalo o Faleata i Sisifo.
O le mafuaaga foi lea na toe teuteu ai e le Palemene le tulafono e faasino i faipule filifilia e itumalo ma vaega faaupufai latou te lagolagoina, lea ua loka ai faipule mai le toe o ese ma pati ua lesitala ai pe a fia lagolago i se isi pati. Ua loka mau ai foi le faitotoa o se faipule poo ni faipule e fia o ese ae faatū se latou lava pati faaupufai. O le faaiuga o lea tulaga o le soloia o nofoa ae toe foi e faatino palota laiti poo byelection, ma o le vaega tonu lea na toe teuteu i le paeaiga ua mavae a le Palemene lea e mafua ai se finagalo o Lealailepule faasino i le faipule o le HRPP mai le itumalo o Siumu. E oo mai i le faaiuga o le vaiaso ua mavae atu nei e lei toe mapuna mai se finagalo o Tu‘uu i le faatūina o se pati fou, e oo foi i lona faamaonia pe toafia ni faipule o le HRPP o loo lagolagoina o ia e avea ma taitai ma avea ma sui o le pati fou.