O le alii lenei o Lefiti Matamua, 17 tausaga o Siumu (pueina lona ata ma lana tusipasi) o se tasi lea o sui mai le aiga tautai o le motu o Upolu sa auai i se aoaoga mo agavaa ma tomai mo le saogalemu i taimi o fagotaga.
Ua faamanuiaina o ia i se aoaoga na faatautaia mo vaiaso e tolu ma ua aloaia ai lona tusipasi ua ia ausia le agavaa mo le saogalemu a o feagai ai ma faiva faatautai.
Sa tuua e lenei alii le aoga i le Vasega 12, ma o lana vaai i le avea ai o ia ma tautai i le lumanai lea o loo galue ai i se auvaa a se tasi o tamalii o lo latou afioaga ma ua faalautele ai ma lona tomai i le auai mai i le aoaoga ua mae‘a.
O se aoaoga ua unaia e le Matagaluega o Faatoaga ma Faiga Faiva ona o le toatele o tautai ua maumau soifua i le gataifale i taimi e agai ai mo faiga faiva masani.
O le tomai ina ia mafai ona saili auala e tali atu ai i le tulai mai o faalavelave faafuasei i luga o le sami, e manatu le matagaluega e tatau ona silafia uma e i latou ua galulue o tautai o vaa fagota ia e saili seleni i lenei tomai aemaise foi soo se tagata faifaiva lava.
Faaalia e Lefiti, “e tolu i le fa aso e alu ai o matou faiva, ma a lelei a le faiva ua lelei foi le tupe maua”. I se sauniga faapitoa mo le tauaaoina o tusipasi mo le aiga o tautai o Upolu, na saunoa ai le afioga i le Minisita o Faatoaga ma Faigafaiva, Le Mamea Ropati, i le faamalosia ai o pule o auvaa taitasi e unaia o latou auvaa mo aoaoga o le saogalemu i taimi o fagotaga.
“Ua matauina le toatele o tagata faifaiva e lei aoaoina i tomai ma agavaa o le saogalemu i fagotaga ona o le augatata o pule o vaa fagota e totogi aoaoga mo a latou auvaa,” o se saunoaga lea a le alii Minisita.
Na ia faaalia foi, o le mafuaaga lea o le leiloloa o vaa ma tagata faifaiva, ona o le lē iai o ni agavaa i itu e tatau ona fai pe a feagai ma faafitauli ma e toe faamanatu ai i pule o vaa fagota faapea auvaa, e ao ona ola tapenapena i soo se itu.
E tusa ma le 41 soifua ua maumau, o tuugamau lē elia foi ia i le moana, ona o faalavelave na tulai mai i vaa faagota leiloloa faapea foi o latou lava fagotaga. E fautuaina lava e le Ofisa o Faigafaiva le unaia o aoaoga mo auvaa, ina ia foia le tulai mai o faalavelave ma ia saogalemu ma mautinoa le malosi o le vaa, mautu totoga poo mea faigaluega e faaaogā, ia silafia le faaaogāina o mea fagota ma ia usitaia taiala ma tulafono e pei o le silafia o ogasami e le tatau ona sopoia i taimi o fagotaga.
Ua iai foi se ala leo (masini mo fesootaiga) ua tapena i ai le Komiti mo fagotaga faapisinisi, mo fesootaiga tu’u sa’o e iloa ai e le ‘au fai faiva ogasami o fagotaga. O le tulaga lava e tatau ona ausia e soo se vaa fagota, o le ausia e le auvaa o tomai amata mo le saogalemu ma o le a tauaaoina foi e le Matagaluega o Galuega ma Felauaiga tusi mo soo se vaa fagota ma auvaa e faamaonia ai ua ausia itu uma mo le saogalemu i fagotaga.
O se tasi o itu ua tulai mai i nisi o auvaa, o le tagofia o laau faasāina ma e iai masalomia e le Ofisa o faiga faiva, o le tasi lea faapogai o le aafia o nisi auvaa i faafitauli ma lē mautonu ai i faaiuga fai mo le saogalemu.
Ua iai auvaa ua faamaonia ua faasala e le Ofisa ona o lea tulaga ma o le a lē taofia ai le ave i le tulafono pe a toe maua le tagofia e soo se auvaa o laau faasāina i taimi o fagotaga. O le aoaoga ua mae‘a mo le aiga tautai o Upolu i le tolu vaiaso talu ai o le a faatautaia i le masina o lumanai nei mo le aiga tautai i le motu tele i Salafai, ma o le a faatautaia lava e alii kapeteni poo i latou o loo faatautaia aoaoga i le Iunivesete Aoao o Samoa i lea foi matata.
