“Poo se vaega o femalagaiga poo leoleo na mafua ai le faaletonu i le alii Nigeria”
… Aeau Peniamina
O le vaiaso nei e faato‘ā tuua ai e le alii Nigeria o William Okoro Samoa, ina ua mae‘a ona tapena e le vaega o femalagaiga ma le Matagaluega o Leoleo ma falepuipui lana malaga e toe foi i lona atunuu. O le foi ese o lea alii o le a faatietie ai i le tipoti, pe aveesea faamalosi ma le atunuu. E ui ina faapea o le a tipoti ese lea tagatānuu Nigeria, ae ua ia maua se taui e $103,000 ina ua manumalo lana finau ise taui ona o ana meatotino na leiloloa, ao taofia ile vaaiga a leoleo. O ia meatotino e aofia ai ma se tinoitupe. O le taunuuga o lea faamasinoga ua finauina ai e le Itu agai se faaiuga a le Malo e faia ai se suesuega i le faaletonu na tulai mai, poo ai tonu o le vaega o femalagaiga a le Malo ma le Matagaluega o leoleo na mafua ai ona tuai aveesea lea alii ma Samoa.
O atugaluga o le Itu agai e pei ona faaleo e le sui taitai le afioga Aeau Peniamina i se feiloaiga ma tusitala, o le maumau o tupe a le Malo ma le atunuu ua alu le aoga i lea mataupu.
“O tupe nei o seleni uma a le atunuu, ma e ao i le Malo ona sailiili poo ai tonu na mafua ai le faaletonu”.
E $10 miliona na finauina e le alii Nigeria e ala atu i lana loia o Toleafoa Solomona, e faavae ile toesea o ana meatotino, le sauāina o ia e nisi o alii leoleo a o taofia i le falepuipui i Tafaigata, ma le taofia e leoleo e aunoa ma se solitulafono.
Faaalia e le sui taitai o le Itu agai ana lelei ona taulimaina e matagaluega e fitoitonu i le mataupu le aveesea o lea alii ma le atunuu, e lē aliali mai se faamasinoga ma alu ai ma tupe a le atunuu.
O le itu i tuua‘iga i sauāga a nisi o leoleo na faia i le alii Nigeria, ua faaalia e le sui sooupu o le matagaluega o leoleo ma falepuipui, le afioga Leaupepe Fatu Pula, ua tuuina atu i le vaega o suesuega faalotoifale a le matagaluega e nafa ma mataupu e aafia ai amioga taualoa a leoleo e faia le suesuega ona tuuina atu lea o se lipoti ma ni fautuaga i le Komesina o le matagaluega mo sana faaiuga.
O le vaiaso ua tuanai na tuuina atu i le faamasinoga e le vaega o femalagaiga a le Matagaluega a le Palemia ma le Kapeneta se folasaga na faailoa atu ai le mae‘a ona tapena o pepa malaga uma mo le alii Nigeria mo lona toe foi atu i lona atunuu.
O le totogi atoa o femalagaiga a le alii o Okoro mo le foi i lona atunuu ua totogi uma e le Malo o Samoa e tusa ai ma le faaiuga a le faamasinoga.
E lē aofia le tau atoa o ia faigamalaga i vaalele ma faletalimalo o le a faamautu ai, mo le pueina o vaalele e agai i lona atunuu, i le tinoitupe e selau ma ona tupu afe ua maua e lea alii e avea ma ona taui i le tulaga faaletonu na tulai mai, a o iai i Samoa mo le lata i le 12 masina.
